Lıtva ýnıversıtetteri qazaqstandyqtar úshin 200-den astam grant usyndy, dep habarlaıdy «Halyqaralyq baǵdarlamalar ortalyǵy» AQ saıty.
Búgingi tańda qazaqstandyqtardy sapaly sheteldik bilimmen qamtamasyz etý maqsatynda Halyqaralyq bilim berý baǵdarlamalarynyń ákimshisi bolyp tabylatyn «Halyqaralyq baǵdarlamalar ortalyǵy» AQ bilim berý granttaryn arttyrý boıynsha jumystar júrgizip jatyr. Nátıjesinde bıylǵy jyly Qazaqstan azamattary úshin shet eldik oqý oryndarymen 10 myńnan astam grant bólindi, onyń ishinde Lıtva Respýblıkasynyń (budan ári - Lıtva) úlesi birshama», -delingen habarlamada.
200-den astam tolyq jáne jartylaı granttar usynyp otyrǵan Lıtva ýnıversıtetteri Qazaqstan azamattaryna tek aǵylshyn tilinde ǵana emes, sonymen qatar orys tilinde de oqytylatyn bakalavrıat jáne magıstratýra baǵdarlamalaryna emtıhansyz túsýge múmkindik beredi. (Lıtvanyń joǵary oqý oryndaryna túsetin adamdar sanyna qaraı granttar sany artýy múmkin).
Aıta ketetin jaıt, grant utyp alǵan stýdentter arasynda áleýmettik jaǵdaıy tómen stýdentterge aı saıyn stıpendııa alýǵa múmkindik beriledi. Bıylǵy jyldyń maýsym aıynda Lıtvanyń joǵary oqý oryndarynyń ókilderi Ońtústik Qazaqstan oblysynyń mektep jáne ýnıversıtet túlekteri arasynda aqparattyq kezdesýler ótkizedi dep josparlanýda, bul kezdesýler aıasynda úmitkerler Lıtva ýnıversıtetterine túsý úshin qujattardy tapsyra alady.
Qazaqstannyń basqa qalalary men aımaqtaryndaǵy úmitkerler óz qujattaryn Lıtvanyń joǵary oqý oryndarynyń resmı saıttaryna aǵymdaǵy jyldyń 1 maýsymynan bastap joldaı alatyn bolady. Lıtva ýnıversıtetteriniń ókilderimen kezdesýler 11 maýsymda Shymkent qalasynda, 12 maýsymda Jetisaı jáne Saryaǵash qalalarynda, al 13 maýsymda Túrkistan qalasynda ótkiziledi.