Túrkııanyń Kastamoný qalasyndaǵy túrki tildes halyqtarynyń óner festıvalinde Turmaǵanbet halyq aspaptar orkestriniń konserti anshlagpen ótti. Konserttik baǵdarlamany tamashalaǵan kópshilik qoshemetin bildirdi.
Konsertte qazaq halqynyń ánderi, Álshekeı, Qurmanǵazy, Qorqyttyń kúıleri jáne álemdik, qazaqstandyq kompozıtorlardyń shyǵarmalary oryndaldy.
Sonymen qatar, orkestrmen birge О́zbekstan, Qyrǵyzstan, Ázerbaıjan jáne Túrkııa memleketteriniń ónerpazdary da óner kórsetti.
Esterińizge sala ketsek, Halyqaralyq TÚRKSOI uıymynyń uıymdastyrýymen shara 1-10 maýsym aralyǵynda Túrkııa memleketinde ótýde. Festıval aıasynda orkestr ujymy Ankara, Aqsaraı jáne Bolý qalalarynda óner kórsetedi.
Atap ótý kerek, Turmaǵanbet halyq aspaptar orkestri Syr súleıi, ataqty shaıyr Turmaǵambet Iztileýulynyń 125 jyldyq mereıtoıy qarsańynda 2007 jyly Qyzylorda oblystyq fılarmonııasy janynan quryldy.
Búginde orkestr quramynda 45 mýzykant bar. Ujymmen tájirıbeli 2 dırıjer, orkestrdiń jeteshisi Keýlimjaı Botabaev jáne Kúldary Izbanova jumys jasaıdy. Kórkemdik jetekshisi – Samat Abylaev.
Orkestr repertýarynda 300-ge jýyq qazaq ulttyq ánderi, kúıleri, Qazanǵap, Shal Myrza, Bekpembet, Álshekeı, Jaldybaı, Dosjan Tólegen, Qazaqstan jáne jergelikti kompozıtorlarynyń shyǵarmalary qamtylǵan.
Ujym oryndaýynda klassıkalyq mýzyka, sondaı-aq, orys, káris, uıǵyr, ázerbaıjan jáne tájik áýenderi bar.
Orkestr óziniń erekshe oryndaýshylyǵy arqasynda úlken qoshemetke ıe bolǵan. Ermek Serkebaev, Bıbigúl Tólegenova, Nurǵalı Núsipjanov jáne t.b. konsertteri orkestrdiń súıemeldeýimen ótti.