Keshe Astanada taǵy bir aýqymdy halyqaralyq jıyn – «Blokcheındi retteý: onyń keleshegi men táýekeli» atty konferensııasy óz jumysyn bastady. Eki kúnge josparlanǵan halyqaralyq konferensııanyń ashylý saltanatyna Qazaqstan Premer-Mınıstriniń orynbasary Asqar Jumaǵalıev qatysty.
Jıynda sóılegen sózinde A.Jumaǵalıev Qazaqstanda jańa tehnologııalardy qoldanýdyń mańyzdylyǵyna toqtalyp, olardy damytýdyń qajetti sharttaryn atap ótti. «Sıfrly Qazaqstan» baǵdarlamasynyń baǵyttary aıasynda ınternet, addıtıvtik tehnologııalar, jasandy ıntellekt, blokcheın sııaqtylardy damytýǵa basa nazar aýdarylyp otyr. Blokcheın tehnologııalardy qoldaný mámileler nemese operasııalardy júrgizý kezinde deldaldarǵa táýeldi bolmaı, kedergilerdi joıýǵa septigin tıgizedi, dedi Premer-Mınıstrdiń orynbasary. Ol sondaı-aq búgingi tańda Qazaqstanda blokcheın tehnologııalarynyń negizinde túrli salalarda jobalar júzege asyrylyp jatqanyn tilge tıek etti. Buǵan Ulttyq banktiń el turǵyndary úshin qysqa merzimdi notalar shyǵarýy, Aýyl sharýashylyǵy mınıstrliginiń elektrondy astyq qolhattaryn júrgizýde blokcheındi qoldanýy mysal bola alady. Budan basqa Qarjy mınıstrligi, «Qazposhta» AQ, «Azamattarǵa arnalǵan úkimet» memlekettik korporasııasy blokcheın tehnologııalar negizindegi jobalardy iske asyryp keledi. A.Jumaǵalıev bul tehnologııalardy odan ári damytý úshin zańnamalyq baza men qajetti ınfraqurylym qajet ekenin aıtty. Osyǵan baılanysty Aqparat jáne kommýnıkasııalar mınıstrligi jáne «Zerde» UAH» AQ nazaryn atalǵan máselelerdi sheshýdi jyldamdatý qajettiligine aýdardy.
Jalpy, konferensııaǵa basqa da mınıstrlikter men túrli memlekettik organdardyń, iri ulttyq kompanııalardyń, zertteý ınstıtýttarynyń ýnıversıtetterdiń, sheteldik jáne lokaldy IT, telekom, energetıka, konsaltıng kompanııalardyń ókilderi, sarapshy tulǵalar qatysty. Al sharany uıymdastyrýshy – Qazaqstan Respýblıkasynda Blokcheın jáne krıptotehnologııalardy damytý ulttyq qaýymdastyǵy eken. Bul rette konferensııany uıymdastyrýshylar tarapynan atalǵan qaýymdastyqtyń prezıdenti Alan Dorjıev sóz sóıledi. Ol memlekettiń kásibı qoǵamdastyqpen jáne beıindi qaýymdastyqtarymen ózara yqpaldastyǵy eldiń aldynda turǵan maqsattarǵa jetý úshin mańyzdy ári basty tetikterdiń biri ekenin aıtty. Konferensııany uıymdastyrýdaǵy basty maqsat – osy saladaǵy álemdik úzdik tájirıbelerdi jınaý jáne óńdeý. Uıymdastyrýshy retinde biz memleketpen tyǵyz yntymaqtastyqta osy tájirıbeni úırenip, onyń negizinde Ulttyq banktiń, iri sheteldik kompanııalardyń, basqa da múddeli taraptardyń múddelerin eskere otyryp, qajetti quqyqtyq qujattardy ázirleý úshin múmkindiginshe barlyq qajetti quraldardy jetkizýge áreket jasadyq, dedi A.Dorjıev.
Konferensııaǵa IBM, Hyperledger, KPMG, Infosys, Eýropa Qaıta Qurý jáne damý banki, AHQO sekildi jetekshi álemdik kompanııalar, qarjy ınstıtýttary men retteýshileri qoldaý bildirgen. Konferensııa jumysy búgin de jalǵasýda, onda blokcheın tehnologııalardy ekonomıka, bilim berý, memlekettik qyzmetter jáne óndiristiń túrli salalarynda qoldaný sekildi máseleler qaralýda. Spıkerler blokcheın tehnologııalardy qoldaný boıynsha jeke tájirıbelerin bólisip, álemniń túrli elderinde olardy retteý tájirıbeleri týraly áńgimeleıdi. Ekinshi kúnniń mańyzdy bóligi AHQO-nyń vırtýaldy aktıvterdi retteý salasyndaǵy zańnamany tanystyrýy, sondaı-aq AHQO qarjy qyzmetterin retteý komıtetiniń (Astana International Financial Authority, AFSA) vırtýaldy krıptovalıýtalardy retteý jáne jeke ornalasymnyń keńeıtilgen rejimderi máseleleri jónindegi konsýltatıvtik qujatyn talqylaýdyń ashylýy bolmaq.
Dınara BITIK, «Egemen Qazaqstan»