Aqtóbede otorınolarıngologtardyń «Otorınolarıngologııadaǵy zamanaýı tujyrymdamalar men ınnovasııalyq tehnologııalar» atty halyqaralyq ǵylymı-tájirıbelik konferensııasy aıasynda estý jáne tynys alý organdaryn qalpyna keltirý boıynsha jeti kúrdeli ota jasaldy.
6-7 maýsym kúnderi Ońtústik Koreıa, Túrkııa, Reseı, О́zbekstan, Qyrǵyzstan men Qazaqstannyń jetekshi dárigerleri medısınanyń mańyzdy baǵyttarynyń birin damytýdyń ózekti máselelerin talqylady. Iri shara Aqtóbe medısına ortalyǵy janynan ótip jatyr.
- Elbasy densaýlyq saqtaý salasyn damytýǵa erekshe kóńil aýdarady, Qazaqstan Táýelsizdik jyldary ishinde medısınada aıtarlyqtaı jetistikterge jetti, ınnovasııalyq tehnologııalar engizilýde, kúrdeli otalar jasalyp jatyr. Prezıdent tapsyrmasy boıynsha elimizde densaýlyq saqtaý salasyn sıfrlandyrýdyń tıimdi sharalary qoldanylýda. Mańyzdy baǵyttardyń biri - otorınolarıngologııa tabysty damyp keledi. Buǵan qosa, biz alys-jaqyn shetelderdiń mamandarymen tájirıbe almasý jáne halyqaralyq áriptestik jumystaryn kúsheıtýimiz qajet. Halyqaralyq qatynastardy nyǵaıtý maqsatynda ótkizilip jatqan ǵylymı-tájirıbelik konferensııa eldegi otorınolarıngologııany damytýǵa jańa serpin beretinine senimdimin, - dedi konferensııa jumysyn ashqan oblys ákimi Berdibek Saparbaev.
О́ńir basshysy sheteldik sarapshylarǵa aqtóbelik dárigerlermen tájirıbelerimen jáne zamanaýı kómektiń ádisterimen bóliskenderi úshin, oblys turǵyndaryna kúrdeli otalar jasap, tájirıbelik kómek bergenderi úshin alǵys aıtty. Atap aıtqanda, túrik dárigerleri «Baqytty bala» jobasy aıasynda estý qabileti nashar úsh balaǵa tegin ota jasaıdy.
Konferensııa kezinde oblystyń otorınolarıngologııalyq qyzmetine súbeli úles qosqan densaýlyq saqtaý salasynyń ardagerleri marapattaldy.
Shara sońynda delegattar osy baǵytty damytýǵa jáne jetildirýge múmkindik beretin qarardy qabyldady.
Eki kún boıy Ońtústik Koreıadan, Túrkııadan kelgen hırýrg sarapshylar, qazaqstandyq ǵylymı ortalyqtardyń jetekshi professorlary qulaq mıkrohırýrgııasy, endoskopııalyq rınosınýsohırýrgııa, kómeı mıkrohırýrgııasy boıynsha ınnovasııalyq jobalardy qoldana otyra sheberlik sabaqtaryn ótkizedi.
Temir Qusaıyn,
«Egemen Qazaqstan»
Aqtóbe