Aımaq basshysy Qumar Aqsaqalov oblystyq ákimdiktiń otyrysynda M. Qozybaev atyndaǵy Soltústik Qazaqstan memlekettik ýnıversıteti álemdik talaptarǵa saı bolý qajettigin atap kórsett.
Jasyratyny joq, joǵary oqý ornynyń materıaldyq-tehnıkalyq bazasy kóp jyldar boıy jańartylmaı kelgen. Jataqhanalar ábden eskirgen. Oqý aqysynyń qymbattyǵynan stýdentter sany azaıyp ketken.
«Mektep túlekterimen jaǵymdy jańalyqty bóliskim keledi.Joǵary oqý orny janynan zamanaýı korpýs turǵyzylatyn bolady. Sonymen qatar jataqhana da salynady», dedi Q. Aqsaqalov.
Bıyl M.Qozybaev atyndaǵy Soltústik Qazaqstan memlekettik ýnıversıtetine 1000 grant bólinedi, bul byltyrǵy jylmen salystyrǵanda 5 ese kóp. «Tehnıkalyq ǵylym jáne tehnologııa», «Aýyl sharýashylyq ǵylymdary», «Áleýmettik ǵylymdar, ekonomıka jáne bıznes» sekildi 29 jańa mamandyq túrleri oqytylmaq. Jalpy medısına, farmasııa mamandyqtaryn ashýǵa lısenzııa berilipti. Internatýra ashý da josparlanǵan.
Qazir munda 5,5 myń stýdent bilim alady. Kelesi jyly stýdentterdiń sanyn 7 myńǵa deıin ulǵaıtý kózdelgen.
О́mir ESQALI,
«Egemen Qazaqstan».