Din isteri jáne azamattyq qoǵam mınıstri Darhan Káletaev Atyraý oblysyna jumys sapary aıasynda oblystyq Din isteri basqarmasynyń Aqparattyq-taldaý ortalyǵynyń jumysymen tanysyp, óńirdegi meshitterde qyzmet jasaıtyn ımamdarmen kezdesti.
Kezdesý barysynda mınıstr meshit ımamdarynyń ýaǵyz aıtýyna nazar aýdardy. Onyń aıtýynsha, ýaǵyzdar «Ýaǵyz aıtýdyń biryńǵaı tártibinde» bekitilgen qaǵıdat boıynsha júzege asyrylýy tıis.
«Qazaqstan musylmandary dinı basqarmasy janynan BAQ betterinde sóıleıtin 44 ımamnan turatyn arnaıy pýl qalyptasqan. BAQ betteri men áleýmettik jelilerde ımamdar pýlynda bekitilgen dinı qyzmetshiler QMDB-men kelise otyryp pikir bildirýleri qajet dep sanaımyz. Bekitilgen tártip boıynsha ýaǵyz aıtýdyń sheńberinen aspaýlaryńyz oryndy bolady dep sanaımyz. Qoǵamda dinge qatysty birjaqty jáne óte sezimtal taqyryptarǵa pikir bildirý keri is-áreket týǵyzýy múmkin. Biz dinniń oń áleýetin halqymyzdy biriktirýge, elimizdi ilgeri damytýǵa jumyldyrýymyz kerek», - Darhan Káletaev
Sonymen qatar, mınıstr QMDB bekitken «Meshitterdiń ishki tártip erejesin» jetildirýdi usyndy. Onyń aıtýynsha, erejege qatysty Mınıstrlikke qazirgi ýaqytta kóptegen azamattardan shaǵymdar men ótinishter kelip túsýde. Erejeniń qoldanystaǵy zańnamaǵa qarsy kelmeýi jáne adamnyń quqyqtaryn shektemeý qajettigi aıtyldy.
2017 jylǵy 15 aqpanda Din isteri jáne azamattyq qoǵam mınıstrligi men Qazaqstan musylmandary dinı basqarmasy arasynda ózara árekettesý týraly Kelisimge qol qoıylǵan. Qujatta Dinı basqarmanyń din salasyndaǵy ózekti máseleler boıynsha memleketpen tyǵyz qarym-qatynas ornatý máseleleri qarastyrylǵan.
Atyraý oblysy boıynsha 29 ıslamdyq, 3 pravoslavtyq, 2 katolıktik jáne 7 protestanttyq baǵyttaǵy dinı birlestikter tirkelgen. О́ńirdegi 29 meshitte 68 ımam jumys jasaıdy.
Din isteri jáne azamattyq qoǵam mınıstri Darhan Káletaev Atyraý oblysyna jumys sapary barysynda «Át-Taqýa» meshitine bardy.