Gennadıı Golovkın ıelengen IBF belbeýin endi onyń burynǵy qarsylasy amerıkalyq Denıel Djeıkobs pen ýkraınalyq Sergeı Derevıanchenko sarapqa salýy múmkin.
«Eger Alvares pen Djeıkobs kelisimge kele almasa, amerıkalyq boksshy bos turǵan IBF tıtýlyn Sergeı Derevıanchenkomen (12-0, 10 KO) sarapqa salady», - deıdi menedjer Kıt Konnollı. Konnollı Derevıanchenkonyń da, Djeıkobstyń da menedjeri. Ári bul eki boksshynyń bapkeri de - amerıkalyq maman Andre Roze.
«Qazir biz «Kanelomen» kezdesý ótkizý jóninde kelissóz júrgizip jatyrmyz. Biraq aldaǵy bir-eki kúnde kelisimge kele almasaq, onda Djeıkobs bul ıdeıadan bas tartyp, Derevıanchenkomen judyryqtasýyna týra keledi. Men bul týraly Rozemen sóılestim. Ol narazy bolǵanmen, jaǵdaıdy túsinip otyr», - deıdi Konnollı.
Osyǵan deıin IBF beldigin ıelenip kelgen qazaqstandyq boksshy Gennadıı Golovkın úmitker sanalyp kelgen Derevıanchenkomen kezdesýdi keıinge qaldyrmaq bolǵany úshin aıyrylǵan bolatyn. Golovkınniń mundaı qadamǵa barýyna meksıkalyq Saýl Alvarespen jekpe-jek ótkizý máselesi sebep bolǵan. IBF basshylyǵy resmı túrde qazaqstandyq boksshyny tıtýlynan aıyrǵannan keıin meksıkalyq boksshynyń promoýteri Oskar de la Hoııa jekpe-jek ótpeıtinin, kelissózder júrgizilmeıtinin aıtty. Alaıda ol bul kezdesýdi tek keler jyldyń 5 mamyrynda uıymdastyrýǵa bolatynyn jetkizdi.