Ońtústikte bóliný jolymen qurylǵan aýdandarda «Elbasynyń Jarlyǵy - óńirdiń órkendeýi» atty saltanatty shara ótti.
Maqtaaral aýdanyndaǵy «Alpamys batyr» atyndaǵy ortalyq stadıonynda ótken shara óńirdiń tarıhynan syr shertetin teatrlandyrylǵan qoıylymmen bastaldy. Aıta ketelik, jańa qurylym boıynsha Jetisaı aýdanynyń aýmaǵy - 104428 gektar, halqynyń sany - 172 903, quramynda 13 aýyldyq okrýg pen 113 eldi meken bolmaq. Ortalyǵy- Jetisaı qalasy. Al Maqtaaral aýdanynyń aýmaǵy - 80970 gektar, halqynyń sany – 131 781, 11 aýyldyq okrýg pen 69 eldi meken qaramaǵynda bolady. Ortalyǵy – Myrzakent kenti. Jańa aýdandar turǵyndarynyń qýanyshyn, Elbasy qol qoıǵan tarıhı sheshimniń mańyzyn bildiretin saltanatty sharada Ońtústik Qazaqstan oblysynyń ákimi Janseıit Túımebaev halqy eń tyǵyz shoǵyrlanǵan aýdandy Maqtaaral jáne Jetisaı dep bólip bergen Prezıdentke el erekshe rızalyǵyn bildirip jatqanyn atap ótti.
Osyndaı saltanatty shara jańadan qurylǵan Keles aýdanynyń ortalyǵy Abaı aýylyndaǵy ortalyq stadıonda da ótti. Jańa qurylym boıynsha Saryaǵash aýdanynyń aýmaǵy aýmaǵy - 417074 gektar, halqynynyń sany – 191 096, quramynda 14 aýyldyq okrýg pen 71 eldi meken bolmaq. Ortalyǵy - Saryaǵash qalasy. Al Keles aýdanynyń aýmaǵy - 345 127 gektar, halqynyń sany – 135 819, 12 aýyldyq okrýg pen 83 eldi meken qaramaǵynda bolady. Ortalyǵy – Abaı aýyly.
Jańa aýdandardyń turǵyndaryn quttyqtaǵan oblys ákimi óńir eknomıkasyn damytý úshin ter tógip, eńbek etken azamattardy «Oblysqa sińirgen eńbegi úshin» medalimen, oblys ákiminiń gramotasymen jáne alǵys hatymen marapattady. Merekeli shara konserttik baǵdarlamaǵa ulasty.
Erkin DOSYMBAI,
Ońtústik Qazaqstan oblysy