Ramazan aıynda túsetin, musylmandar úshin eń qasıetti tún bolyp esepteletin Qadir túni bul jyly maýsymnyń 11-inen 12-ine qaraǵan túnge sáıkes kelip otyr.
1000 aıdan qaıyrly bolǵan bul tún arab tilinde Láılátýl Qadr dep atalady. Musylman senimi boıynsha dál osy qadir túninde aspannan Jebireıil perishte túsip, Muhammed paıǵambarǵa (sallallahý aláıhı ýásálám) Quran kitapty bergen. Osyndaı qasıetti Quran kitap túsken túnde Allanyń meıirimi ádettegiden artady.
Paıǵambarymyz (sallallahý aláıhı ýásálám) bir hadısinde: «Allah Qadyr túnin úmbetime syı retinde tartý etti, bul burynǵy úmbetterge berilmegen» dep, bul syıdyń qadirin bilýge shaqyrady. «Bul túni saýabyn tek qana Alladan kútip, sol túnin ǵıbadat etýmen ótkizse, kúnálary keshiriledi», delingen taǵy bir hadısinde.
Bul túnniń artyqshylyǵy men qasıettiligin túsindiretin Quranda súre de bar: «Biz Ony (Qurandy) qadir túni túsirdik. Qadir túniniń ne ekenin bilesiń be? (Allah Taǵala bildirmese) qaıdan bilesiń? Qadir túni myń aıdan da artyq. Ol túni Allahtyń ruqsatymen kez kelgen is úshin Rýh pen perishteler túsedi. (ásirese ol túndi ǵıbadatpen ótkizgender úshin) tań atqanǵa deıin Allahtyń raqymy men esendigi jaýady» («Qadir» súresi).
Bul túndi qarsy alar aldynda musylmandar tolyqtaı ǵusyl quıynyp, denesi men kóńilderin barlyq kirden aryltady. Jasalǵan ǵıbadat, qulshylyqtyń seksen úsh jylǵa, ıaǵnı myń aıǵa teń bolatyndyǵyna baılanysty musylmandar Qadir túnin qulshylyqpen ótkizýge tyrysady.
Sondyqtan árbir pende múmkindiginshe, Qadir túninde beriletin syıdan qur qalmaýǵa tyrysýy kerek. Ol túndi bos ótkizbeı, dáret alyp, namaz oqyp, duǵa etip, Alla Taǵaladan shyn júrekten surap, qulshylyq jasap ótkizgen jón.
Baǵdat ÁShIM,
L.N.Gýmılev atyndaǵy Eýrazııa Ulttyq ýnıversıtetiniń 1-kýrs stýdenti