Semeıge Qazaqstan Jazýshylar odaǵynyń tóraǵasy, aqyn Ulyqbek Esdáýlet arnaıy kelip «Poezııa marafony» sharasyna qatysty. Shara aıasynda Ulyqbek Esdáýlet Semeı qalasynyń ákimi Ermak Sálimovtyń qabyldaýynda bolyp, qazirde ózi basqaryp otyrǵan Jazýshylar odaǵynyń hal-jaıymen tanystyrdy.
– Búginde Odaq quramynda 800-deı jazýshy bar, – dedi Ulyqbek Esdáýlet. – Munyń 500-deıi zeınetker. Jazýshylar odaǵynyń Semeı qalalyq fılıalyn uzaq jyldar boıy abaıtanýshy Tóken Ibragımov basqardy. Endi mine, kópshiliktiń usynysymen fılıal jetekshiligine jas aqyn Mereı Qartovty bekitip otyrmyz.
Jıynǵa belgili qalamger Medeý Sárseke, Jazýshylar odaǵynyń Shyǵys Qazaqstan oblystyq fılıalynyń jetekshisi, aqyn Álibek Qańtarbaev, qoǵam qaıratkeri Túsiphan Túsipbekov, Abaıdyń memlekettik qoryq-mýzeıiniń dırektory Bolat Júnisbekov, aqyn Tynyshtyqbek Ábdikákim qatysty. Aldaǵy ýaqytta Semeıdegi Jazýshylar odaǵynyń bólimine arnaıy jumys kabıneti berilip, barlyq kerek-jaraǵymen qamtylatyn boldy.
Raýshan NUǴMANBEK,
jýrnalıst
SEMEI