Elordada Qazaqstannyń ekologııalyq bilim berý baǵdarlamasy aıasynda «Uly Dala boıaýlary» atty Respýblıkalyq balalar jáne jasóspirimder arasyndaǵy baıqaý jeńimpazdary anyqtaldy. Jobany Astana qalasynyń Balalar kórkemsýret mektebi – IýNESKO klýby jáne Qazaqstandaǵy «Shevron» kompanııasy uıymdastyrdy.
Respýblıkalyq balalar baıqaýyna 300-ge jýyq sýretshi jetkinshek qatysty. Olardyń 50-i ǵana úzdik atanyp, 8 bala júldeli oryndarmen marapattaldy. Bas júldeni D.Stavnıchaıa men V.Kavarentka ıelense, júldeli birinshi oryndy O.Bespalova men A.Panomorenko, ekinshi oryndy D.Seıvýhına men B.Beısembekova ıelendi. Al úshinshi oryn M.Qaıratova men A.Snelhanovaǵa buıyrdy.
«Bizdiń kompanııamyz Qazaqstanǵa shırek ǵasyr buryn keldi jáne táýelsiz memleketke qoldaý kórsetken, senim bildirgen birinshi iri batystyq ınvestor boldy. Bizdiń iri áleýmettik jobalarymyzdyń biri jas urpaqty ekologııalyq qundylyqtarǵa óner arqyly baýlý bolyp tabylady. Biz búgin tamashalap otyrǵan sýretterde balalardyń qorshaǵan ortanyń sulýlyǵyn, Qazaqstan halqynyń mádenıetin beıneleýge qushtarlyǵyn anyq kórip otyrmyz», dedi «Shevron» kompanııasynyń ókili Leıla Aıtmuhanova.
Baıqaýǵa qatysýshylar beıneleý quraldarymen qorshaǵan álemdi, ıaǵnı týǵan tabıǵattyń sulýlyǵyn, súıikti qalasyn, jetistikterin, Qazaqstannyń barlyq qazaqstandyqtar úshin ortaq úı ekenin kórsetýge tyrysqan.
Baıqaý aıasynda beıneleý jáne dekoratıvti-qoldanbaly óner, músin jáne qysh boıynsha sheberlik klastar, elordanyń ásem de saltanatty oryndarymen tanysý jáne Ulttyq mýzeıge, «Máńgilik el» saltanatty arkasyna ekskýrsııalar uıymdastyryldy.
Mırajan MAHAN,
L.N.Gýmılev atyndaǵy EUÝ stýdenti