Jylda kelip emdelip júrgendikten júztanys bolyp qalǵan dáriger meni kórgen boıda kúlimsirep: «Kelińiz», dedi de ózimen birge kabınetine ertip kirdi. Esik aldynda kezek kútip otyrǵan úsh-tórt kisi bizge ashyqtan-ashyq qarsylyq bildire qoımaǵanymen, ishteı tiksinip, unatpaı qalǵandaı boldy.
Jáne onyń jazasyn kóp uzamaı-aq mıneraldy vanna qabyldaıtyn korpýsqa barǵanymda birden tarttym.
Qolymdaǵy sanatorıı kartochkasyn medbıkege usyna bergenim sol edi, appaq súlgisin moınyna orap, qasyndaǵy eki apasymen birge vannaǵa kirýge daıyndalyp otyrǵan qaratory qyz maǵan ótkir kózin týra qadap: «Bul joly kezeksiz ótip ketemin deýshi bolmańyz, – dedi qatqyldaý ún qatyp. – Áýeli myna meniń janymdaǵy úlken apalar kiredi».
– Á-á, ıá, – dedim jańa ǵana dárigerdiń qabyldaýyna kezeksiz ótip ketkenimdi esime alyp. – Aldymen apalar, sodan soń siz kiresiz. Keshirińiz, men bárin de túsindim.
«Tik minezdi qyz myna kisimen shekisip qala ma, qaıtedi», dep shoshyp otyrǵan eki apasy osy sátte bir-birine qarap kúlip jiberdi. Qara qyzdyń da óńi jylyp sala berdi.
* * *
Erteńine tús aýa balshyqqa túsýge barǵam, munda da álgi eki apasyn qoltyqtap keshegi qara qyz júr eken. Bas ızep, sálemdesip óttim. Eki kisilik emdeý bólmesine menimen birge kirgen shymyr deneli qaratory jigittiń de túri sondaı tanys sııaqty.
Medbıke aıaǵymdy ystyq balshyqpen orap jatqanda: «Kim boldy eken?..», dep qoıdym ishimnen. Azdan soń boıym balqyp, kózim ilinip bara jatqanyn sezdim...
Balshyqtan soń dýshqa túsip, jyly kıindik te dálizge birge shyqtyq. «Apyr-aı, qaıdan kórip em bul jigitti?..».
Kenet uzyn dálizdiń boıymen bizge qaraı qarama-qarsy kele jatqan manaǵy qara qyzdyń: «Áı, Qanat, –degen daýysy sańq ete qaldy. – Áneýkúngi boksshyny jaqsylap soqpadyń ǵoı! Aıadyń ba, nemene?!».
Álgi jigittiń júzinen bir jyp-jyly shýaq tógilip, jymyń ete qaldy. «Oý, mynaý álemge áıgili boksshy Qanat Islam eken ǵoı!», dedim men tańǵalyp.
Osy kezde bizdiń janymyzǵa jaqyndap qalǵan qara qyz: «Sen ony ylǵı da búıtip urdyń, – dedi tastaı qyp túıip alǵan judyryǵyn Qanattyń murnyna taqap. –Olaı emes, bylaı urýyń kerek edi!».
Qara qyzdyń judyryǵy endi Qanattyń ıeginiń astyna baryp qaıtty.
– Túsindim, túsindim, – dedi Qanat kúlip, qaıta-qaıta basyn ızep. –Endi solaı uratyn bolamyn!..
Sóıtti de ol bizben sypaıy qoshtasyp, tez-tez adymdap kete bardy. Men bolsam, «Áı, myna qyz osy Qanattyń qaryndasy bolyp shyqpasa ıgi edi?!», degen oıdyń tutqynynda qala berdim.
Sonsoń qara qyzǵa qarap:
– Ol sizdiń aǵańyz ba? – dep suradym.
– Iá, – dedi ol keýdesin maqtanysh kernep. –Qanattaı asyl azamat – qazaq qyzdarynyń bárine aǵa emes pe!
– Árıne.
– Keshe tanystyq, – dedi ol sonsoń sabasyna túsip. – Bizge jaqyn korpýsqa ornalasypty. Men ony kórgen boıda: «Oı, Qanat aǵa, men sizdi tanımyn!», dep qalaı aıqaılap jibergenimdi bilmeımin!
– Iаpyr-aı, siz shynynda da, ójet qyz ekensiz, – dedim men oǵan tańdana qarap. –Jańa ǵana álem chempıonynyń ózine bokstyń biraz tásilderin úıretip jiberdińiz ǵoı!
– Endi she?! Men onyń naǵyz jankúıerimin. Qanat rıngke shyqqanda, bile bilseńiz, búkil dúnıeni umytyp ketemin!..
Men qara qyzdyń boıyndaǵy erekshe qasıetti endi túsingendeı boldym. Onyń ótkir janary árdaıym: «Alla adamdardy teń etip, bir-birine baýyr etip jaratqan!» dep turady eken.
Nurǵalı ORAZ,
«Egemen Qazaqstan»