Bıyl Qyzylorda oblysynda rezıdentýraǵa 25 granttan bólek, aımaqtyń mektep jáne medısınalyq kolledjderiniń úzdik túlekterine oblys ákimininiń granttary bólinetin bolady. Bul týraly oblys ákimi Qyrymbek Kósherbaev Medısına qyzmetkeri kúnine arnalǵan saltanatty jıynda habarlady.
Oblystyq mýzykalyq drama teatrynda Medısına qyzmetkerleriniń kúnine arnalǵan saltanatty shara ótkizildi. Qyzylorda oblysynyń ákimi Qyrymbek Kósherbaev dárigerlerdi kásibı merekelerimen quttyqtap, aımaqta medısına salasyn damytý boıynsha ótkizilip jatqan jumystar týraly baıandap berdi. Atap aıtqanda, sońǵy 3 jyldan beri qajetti medısınalyq mamandyqtar boıynsha rezıdentýraǵa granttar bólinip jatyr, aǵymdaǵy jyly da 25 grant bólindi.
«Bıyldan bastap orta mektepter men medısına kolledjderiniń úzdik bitirýshilerine oblys ákiminiń arnaıy granty taǵaıyndalyp otyr. Grant arqyly olarǵa oqý bitirgenshe qoldaý kórsetiletin bolady. Oblys boıynsha jergilikti bıýdjet qarajaty esebinen qajetti mamandyqtarǵa qaıta daıarlaýǵa 2017 jyly 68 mln teńge bólinse, 2018 jyly 2 esege ulǵaıyp, 130 mln teńge qarastyryldy. Aıta ketý kerek, bıyl mamandarymyz Koreıa memleketinde jáne Reseı, Tatarstan Respýblıkasynyń Qazan qalasynda bilimin jetildirýge, Qytaı, Avstrııa, Reseı mamandarymen tájirıbe almasyp, ozyq tehnologııalardy engizýge múmkindik alyp otyr», - dedi aımaq basshysy.
Jyl qorytyndysy boıynsha úzdik qyzmetker atanǵan dárigerlerge 500 myń teńgege sertıfıkattar tabystaldy.
Is-shara merekelik konserttik baǵdarlamamen aıaqtaldy.
Esterińizge sala keteıik, «Sıfrly Qazaqstan» memlekettik baǵdarlamasyna sáıkes sala medısınalyq aqparattyq júıemen 100 paıyz qamtylsa, sıfrlyq tehnologııalardy engizýge, kompıýterlendirýge jergilikti bıýdjetten aǵymdaǵy jylǵa 365 mln teńge qarjy bólindi. Odan bólek, densaýlyq saqtaý salasynda memlekettik-jekemenshik áriptestik te qarqyndy damýda. 2017 jyly 4 joba iske asyrylsa, 2018 jylǵa jalpy quny 14,0 mlrd. teńgeni quraıtyn 28 jobany iske asyrý josparlanýda.
Densaýlyq saqtaý salasynyń ınfraqurylymyn jetildirý maqsatynda sońǵy 5 jyl ishinde jalpy quny 27,4 mlrd. teńgege 58 nysan paıdalanýǵa berildi, onyń ishinde 49-y apattyq jaǵdaıdaǵy nysandar ornyna salyndy.
Atqarylǵan sharalar jalpy ólim-jitimdi 4 paıyzǵa, onyń ishinde náresteler ólimin 41,2 paıyzǵa, qaterli isikten - 22,8 paıyzǵa, týberkýlezden - 2 esege azaıtýǵa múmkindik berdi. Nátıjesinde, oblys halqynyń kútiletin ómir súrý uzaqtyǵy sońǵy bes jylda 2 jyl 6 aıǵa artyp, 72,2 jasty qurady.
Atap óteıik, endigi kezekte Qazaly aýdandyq aýrýhana bazasynda Aral, Qazaly, Qarmaqshy aýdandary men Baıqońyr turǵyndaryna kardıologııalyq ortalyq ashý, Aral jáne Shıeli aýdandarynda 150 oryndyq ortalyq aýrýhanalardyń jumysyn aıaqtaý, Qazaly aýdanyndaǵy Áıteke bı kentinde 250 kelýshige, Qyzylorda qalasyndaǵy Tasbóget kentinde memlekettik jekeshelik áriptestik negizinde reabılıtasııalyq ortalyǵy bar 250 kelýshige arnalǵan emhana, sol jaǵalaýda kópbeıindi 300 tósek-oryndyq aýrýhana qurylysyn bastaý tur.