Bul týraly Aqordanyń baspasóz qyzmeti habarlady.
Jumys sapary aıasynda Qazaqstan Prezıdenti Qazan federaldyq ýnıversıtetine bardy.
Oqytýshy-professorlar quramymen kezdesýdiń aldynda Nursultan Nazarbaev Qazan qalasynda oqyp jatqan Qazaqstan stýdentterimen áńgimelesti. Memleket basshysy jas qazaqstandyqtarǵa tolaǵaı tabys tilep, zor jetistikterge jetýlerine nıettestik bildirdi.
Memleket basshysyna Qazan federaldyq ýnıversıtetiniń Qurmetti professory ataǵy berildi.
Reseı Federasııasynyń jetekshi oqý oryndarynyń biri sanalatyn ýnıversıtet ujymyna arnalǵan sózinde Qazaqstan Prezıdenti bilim ordasynyń akademııalyq jáne ǵylymı bazasy myqty ekenin, sondaı-aq onyń ınnovasııalar salasyndaǵy naqty jetistikterin atap ótti.
– Tarıhı derekterge sáıkes, Qazan ýnıversıtetinde 1877 jyldan bastap qazaq ıntellıgensııasy da bilim ala bastaǵan. Oqý ornynyń Qazaqstanmen tarıhı baılanysy búginge deıin jalǵasyp kele jatqany qýantady. Qazirgi ýaqytta munda túrli mamandyq boıynsha 500-den astam qazaqstandyq stýdent oqıdy, – dedi Nursultan Nazarbaev.
Memleket basshysy Qazaqstan men Reseıdiń 25 jyldyq dıplomatııalyq qatynastary kezeńinde eki jaqty saıası jáne ekonomıkalyq yntymaqtastyq úlgi bolarlyq dárejege jetkenin atap ótti.
– Tyǵyz yntymaqtastyǵymyzdyń arqasynda TMD keńistiginde jańa ıntegrasııalyq birlestik – Eýrazııalyq ekonomıkalyq odaq paıda boldy, – dedi Qazaqstan Prezıdenti.
Nursultan Nazarbaev Qazaqstan men Tatarstan arasyndaǵy yntymaqtastyqty Astana men Máskeýdiń strategııalyq seriktestiginiń mańyzdy elementi dep atady.
– Qazaqstan úshin baýyrlas tatar halqynyń orny erekshe. Bizdiń tarıhı tamyrymyz ortaq, tilimiz, ádet-ǵurpymyz ben salt-dástúrimiz uqsas. Elderimiz arasyndaǵy tarıhı dostyq dánekeri Qazaqstan men Tatarstannyń qazirgi kezeńdegi yntymaqtastyǵy úshin berik negiz bolyp otyr, – dedi Memleket basshysy.
Nursultan Nazarbaev eki mádenıet pen halyqty jaqyndastyra túsý isinde tatar dıasporasy mańyzdy ról atqaratynyna nazar aýdardy.
Qazaqstan Prezıdenti Tatarstan Respýblıkasymen birlese júzege asyrylyp jatqan jobalar jóninde aıtty.
– Biz mashına jasaý, munaı hımııasy, áskerı-tehnıkalyq jáne kólik-logıstıkalyq yntymaqtastyq salalarynda túrli ınvestısııalyq jobalardy birlese iske asyryp kelemiz. Bizdiń elordalarymyz – Astana men Qazan arasynda baýyrlastyq baılanys ornaǵan, al Almaty men Qazan seriktes qalalar sanalady, – dedi Memleket basshysy.
Nursultan Nazarbaev Qazaqstannyń sıfrlandyrý jáne tehnologııalyq revolıýsııa jaǵdaıyndaǵy ekonomıkalyq damý úderisi jóninde aıtty.
Memleket basshysy adamı kapıtaldyń áleýetin arttyrý jáne ıntellektýaldy ult qalyptastyrý úshin Qazaqstan tarapynan atqarylyp jatqan jumystar jóninde keńinen áńgimeledi.
Sonymen qatar, Nursultan Nazarbaev «Tildiń úshtuǵyrlylyǵy» jobasynyń iske asyrylý barysy jáne elimizdiń orta bilim berý júıesine IT-tehnologııalardy engizý jóninde aıtty.
Memleket basshysy búginde Qazaqstanda halyqaralyq baǵdarlamalardyń talaptaryna sáıkes balalardy jaratylystaný-matematıka pánderi boıynsha oqytýǵa baǵdarlanǵan 20 zııatkerlik mektep salynǵanyn atap ótti.
– Indýstrııalyq-ınnovasııalyq damý úderisiniń talaptaryn eskerip, tehnıkalyq jáne kásibı bilim berý isiniń qurylymy men mazmuny jańǵyrtylýda. Qazaqstanda álemdik deńgeıdegi joǵary oqý orny sanalatyn «Nazarbaev Ýnıversıtetiniń» salynýy elimizdiń joǵary bilim berý salasyndaǵy eń iri jáne mańyzdy jobasyna aınaldy. Bul – halyqaralyq standarttarǵa, derbestik jáne akademııalyq erkindik qaǵıdattaryna sáıkes jumys isteıtin Qazaqstandaǵy alǵashqy ýnıversıtet, – dedi Qazaqstan Prezıdenti.
Nursultan Nazarbaev qazaqstandyqtarǵa álemniń úzdik ýnıversıtetterinde bilim alýǵa múmkindik bergen «Bolashaq» baǵdarlamasynyń nátıjeleri jóninde de áńgimeledi.
Memleket basshysy Qazaqstan men Reseı arasyndaǵy tatý kórshilik pen dostyq qatynastardy nyǵaıtý qajettigine nazar aýdaryp, bul máselede jastar mańyzdy ról atqaratynyn atap ótti.
Osyǵan oraı Nursultan Nazarbaev Astana men Máskeý yntymaqtastyǵyn odan ári ilgeriletý úderisine eki eldiń óskeleń urpaǵyn belsendi túrde tartýdy kózdeıtin birqatar is-shara uıymdastyrýdy usyndy.
– Qazaqstan men Reseıdiń jas kóshbasshylarynyń forýmyn uıymdastyrýdy usynamyn. Bul basqosý jastarǵa memleketterimizdi damytýdyń ózekti máselelerine qatysty óz oılaryn ortaǵa salýǵa jáne naqty usynystar ázirleýge múmkindik beredi. Sondaı-aq, mádenı baılanystarǵa tyń serpin berip, elderimizdiń daryndy jáne shyǵarmashyl jastaryna qoldaý kórsetý maqsatymen jas oryndaýshylardyń, sýretshiler men mýzykanttardyń jyl saıynǵy baıqaýlaryn ótkizýdi jandandyrý kerek, – dedi Memleket basshysy.
Qazaqstan Prezıdenti sport salasyndaǵy yntymaqtastyqty da nyǵaıtý qajettigin atap ótti.
– Bizdiń jas sportshylarymyz arasyndaǵy baılanystar ózekti bolyp sanalady. Eki el jastarynyń arasynda turaqty túrde týrnırler ótkizýdi stýdentter qaýymy qoldaıdy dep oılaımyn, – dedi Nursultan Nazarbaev.
Sońynda Memleket basshysy Qazaqstan-Tatarstan dostyǵy men ózara túsinistiginiń izgi dástúri halyqtarymyzdyń ıgiligi úshin jalǵasyn taýyp, nyǵaıa beretinine senim bildirdi.
Qurmetti professor ataǵyn berý rásimi aıaqtalǵan soń Qazaqstan Prezıdenti Qazan federaldyq ýnıversıtetiniń Qurmetti qonaqtar kitabyna qoltańba qaldyrdy.