«Birinshi baılyq – densaýlyq» degen ulaǵatty sózdiń aıasyna jan men tán amandyǵy ǵana emes, mindetterine adal maman – dárigerlerge degen qurmet pen madaq ta kiretin bolsa kerek.
О́ıtkeni «basy aýyryp, baltyry syzdaǵan» naýqastyń dertine shıpa izdep baratyn jeri osy qoly epsek jandardyń aldy ekeni anyq. Al dárigerdiń mindeti tek emdeý ǵana emes, túrli kesapattyń aldyn alý, indettiń jolyn kesý sııaqty jaýapty jumystan turady.
Bul turǵydan alǵanda jetisýlyq aq jeleńdi abzal jandardyń jumysyna joǵary baǵa berýge bolady. Kásibı biliktiń kún sanap artyp, memleket tarapynan jasalǵan qoldaýdyń jyl sanap jaqsarýy aımaqtaǵy medısına salasynyń damýyn jańa beleske kóterip otyr. Memleket qoldaýy degennen shyǵady, qazir oblystaǵy medısına mekemeleriniń áleýeti jaqsarǵan.
Mysalǵa, ótken jyly ǵana Almaty oblysynda 17 densaýlyq saqtaý nysany qoldanysqa berilip, olardyń qatarynda 7 dárigerlik ambýlatorııa, 8 feldsherlik-akýsherlik pýnkt qyzmet kórsetýdi bastady. Bıyl emhanalar men feldsherlik pýnktterdi jańadan salý men kúrdeli jóndeý jumystary jalǵasady. Dál osy maqsatta bıýdjetten 11,7 mlrd teńge qarastyrylǵan. Munan bólek, óńirdegi medısına mekemeleriniń materıaldyq-tehnıkalyq bazasyn nyǵaıtýǵa da aıryqsha kóńil bólinip, jyl basynan beri 3,4 mlrd teńgege qosymsha zamanaýı medısınalyq qural-jabdyqtar satyp alyndy. Al densaýlyq saqtaý salasynyń osy jylǵy bıýdjeti 46,4 mlrd teńgeni qurady.
Osy oraıda elimizdiń medısınasynyń kóshin ilgeri súırep kele jatqan qarapaıym dárigerlerdiń laıyqty baǵasyn bilýimiz kerek. Shıpaly qolymen, qamqor nıetimen el alǵysyna bólengen dárigerler jetip-artylady. Olarǵa degen qurmet te sheksiz. Mysalǵa, Almaty oblysynyń ákimdigi medısına qyzmetkerleriniń kásibı merekesi qarsańynda aımaqtaǵy eńbegi janǵan dárigerlerdi marapattap, qurmet kórsetýdi dástúrge aınaldyrǵan. Osy úrdis bıyl da jalǵasyp, kúni keshe «Úzdik dáriger», «Úzdik aýyl dárigeri» jáne «Úzdik hırýrg» atalymdary boıynsha qara úzip shyqqan jeńimpazdar marapattaldy. Densaýlyq saqtaý mamandaryn Medısına qyzmetkerleri kúni merekesimen quttyqtaǵan oblys ákiminiń orynbasary Jaqsylyq Omar úzdik dárigerlerge 1 mıllıon teńge aqshalaı syılyq tapsyrdy. Oblysta densaýlyq saqtaý salasyna erekshe nazar aýdarylatynyna toqtalǵan ákimniń orynbasary:
– Biz kúndelikti kúrdeli de jaýapty isti abyroımen atqaryp júrgen medısına salasynyń barlyq qyzmetkerlerine zor rızashylyq bildiremiz. О́z tarapymyzdan medısınalyq qyzmet kórsetý sapasyn arttyrýǵa, medısına mamandarynyń alańsyz jumys isteýine qolaıly jaǵdaı týdyrýǵa bar múmkindikti jasaımyz. Halyqtyń densaýlyǵyn nyǵaıtý, salamatty ómir saltyna úndeý – barshamyzdyń ortaq maqsatymyz,– dedi quttyqtaý sózinde.
Bıyl Jetisýdyń úzdik dárigerlerin anyqtaý 11 nomınasııa boıynsha júrgizilipti. Baıqaý nátıjesinde Qarasaı aýdandyq ortalyq aýrýhananyń reanımasııa bóliminiń meńgerýshisi Damılıa Qylyshpaeva – «Úzdik dáriger», Talǵar aýdany Keńdala dárigerlik ambýlatorııasynyń meńgerýshisi Madına Karamshýk – «Úzdik aýyl dárigeri», Taldyqorǵan kóp salaly aýrýhanasynyń hırýrg dárigeri Erken Isaev – «Úzdik hırýrg» jáne Qapshaǵaı qalalyq aýrýhanasy dırektorynyń orynbasary Aısulý Ońǵarova – «Densaýlyq saqtaý salasynyń úzdik menedjer-uıymdastyrýshysy» atanyp, júldegerler qatarynan kórindi.
Sondaı-aq medısına mekemeleri arasynan Jambyl aýdany Yntymaq aýyldyq dárigerlik ambýlatorııasy – «Úzdik aýyldyq dárigerlik ambýlatorııa», Ile aýdandyq ortalyq aýrýhanasy – «Úzdik aýdandyq ortalyq aýrýhana», Taldyqorǵan qalalyq balalar aýrýhanasy – «Úzdik medısınalyq mekeme» nomınasııalary boıynsha jeńimpaz bolyp, aqshalaı syılyqtardy ıelendi.
Qalmahanbet MUQAMETQALI,
«Egemen Qazaqstan»
Almaty oblysy