Halyq danalyǵynda «Sheberdiń qoly ortaq» degen támsil bar. Atyraýlyq dánekerleýshi Aleksandr Rechkın metaldan túrli músin jasaıdy. Onyń buıymdaryna sheteldikter de tapsyrys beredi.
О́ziniń aıtýynsha, kolledj bitirgen soń balyq qorǵaý ınspeksııasynda ınspektor bolǵan. Biraq sheber atanýdy oılamaǵan eken. Keıingi úsh-tórt jylda osy kásipke bet burdy. Qazir qolynan shyqqan músinder tek jergilikti turǵyndar ǵana emes, sheteldikter arasynda da tanymal bola bastady. О́ıtkeni temirden túıin túıetin sheberdiń músinderi ereksheligimen tamsandyrady.
«Osydan 12 jyl buryn jer telimin alǵan edim. Sol kezde úı aýmaǵyn abattandyrýdy oılastyrdym. Sóıtip, dánekerleý apparatyn satyp alyp, túrli músin jasaýdy qolǵa aldym. Bul – meniń hobbıim. Degenmen, toqsan taraýly taǵdyr ne usynaryn kim bilgen? Tórt jyl buryn densaýlyǵym syr berip, bastapqyda júrek talmasy, keıin baýyr sırrozy degen dıagnoz qoıyldy. Dárigerler jumys isteýge, aýyr zat kóterýge tyıym saldy», deıdi A.Rechkın.
Alaıda qol qýsyryp, bos otyrýdy jany súımeıdi. Sóıtip, temirden túrli músin jasaýdy qaıta qolǵa alǵan. Sol kezde oǵan óziniń otbasy, dosy Baǵdat pen onyń jary Saltanat kóp qoldaý kórsetipti. Dánekerleýshiniń qolǵa alǵan isiniń ataýy músin bolǵanymen, kúndelikti ómirde, tipti saýda oryndarynda jıi kezdesetin buıymdarǵa múldem uqsamaıdy. О́ıtkeni Aleksandr Rechkınniń músini – polıgonaldy fıgýra.
«Temirden túrli músin jasaý jeńil kórinýi múmkin. Biraq bul ońaı is emes. Bastapqyda ınternet jelisinen polıgonaldy fıgýra jasaýdyń qyr-syryn izdedim. Keıbir sheberlerge de habarlastym. Alaıda eshkim bul istiń qupııasymen bóliskisi kelmedi. Sondyqtan sheberligimdi ózim jetildirýge tyrystym. Qatelikten sabaq aldym», deıdi ol.
Qazir onyń qolynan shyqqan músinderge tapsyrys berýshi kóbeıdi. Ásirese jeke ıeliktegi úılerdiń aýlasyna qoıatyn túrli ańnyń músinine tapsyrys kóp túsedi. Tapsyrys berýshiler elimizdiń ár óńirinde turady. Tipti Germanııa, Reseı, Belarýs, Lıtva men Belgııadan tapsyrys berýshiler bar.
«Meniń tańdaǵan stılim – kóp qyrly fıgýra. Mundaı fıgýralardy jasaý úshin túrli esepteý, dáldik pen shydamdylyq qajet. Aldymen metaldan búıirli qıyndylar daıyndaımyn. Olardy bir-birine dánekerleý kezinde muqııat bolǵan jón. Bolmashy qatelik fıgýranyń sánin buzady», deıdi dánekerleýshi.
Atyraý oblysy