Qaraǵaıly Qarabulaq aýylynda kóneniń kózine aınalǵan aǵash úıdiń qabyrǵasy qalanǵanyna ǵasyrǵa taıaǵan. Irgetasynan bastap, shatyryna deıin shege qaǵylmaı salynǵan jádigerdiń tarıhy týraly aýyldaǵy mádenıet úıiniń dırektory, sýretshi-músinshi Erjan Qojahmetuly áńgimelep berdi.
«Bul úıdiń qurylysynda birde-bir shege joq. Shyrshalardyń saılary arqyly qobylanyp salynǵan kóne jádiger. О́zdiginen qulamaıtyn berik úı. 1928 jyly turǵyzylǵan. 1932 jyly Qaradala óńirindegi Qyrǵyzsaı aýylyndaǵy balalar úıin osy jerge kóshirip ákelgen. Mektep-ınternatta balalar jatyp oqyǵan. Bul qara shańyraqta aýylymyzda dúnıege kelgen kórnekti memleket jáne qoǵam qaıratkeri, Qazaq respýblıkasynyń Orman jáne aǵash óńdeý ónerkásibi mınıstri Moldan Álderbaev, tarıhshy-akademık Keńes Nurpeıisov saýat ashyp, bilim alǵan. Osyndaı kıeli shańyraqty saqtap qalýǵa aýylymyzdan shyqqan qaltaly, janashyr azamattar áreket etip jatyr. Aldaǵy ýaqytta aýyldyq mýzeıge aınaldyryp, el ıgiligine jaratýǵa nıettimiz», deıdi aýyl azamaty, óner janashyry Erjan Qojahmetuly.
Jalpy aýmaǵy 100 sharshy metrdi quraıtyn aǵash úıdiń ishi 3 bólmege bólingen. Alǵash qalanǵannan bastap aýyl balalarynyń bilim alýyna esigin ashqan aǵash úı 2020 jylǵa deıin balabaqsha retinde paıdalanylyp kelgen. Odan bergi jyldary esik-terezeleri búlingenimen, qabyrǵasy áktelip, edeni syrlanǵan kúıi tur.
Almaty oblysy,
Qarabulaq aýyly