2026 jyldyń mamyrynda jahandyq ınternet keńistiginde kútpegen mádenı úrdis paıda boldy. X (Twitter) platformasyndaǵy @ciscaucasian qoldanýshysynyń bir jazbasy Qazaqstanǵa degen erekshe qyzyǵýshylyqty týdyryp, eldi Batys aýdıtorııasy úshin jańa mádenı fenomen retinde tanytty. «Japonııaǵa qyzyǵýshylyq meınstrımge aınalǵandyqtan, endi nazar Qazaqstanǵa aýysty» degen pikir qysqa ýaqyt ishinde keń taralyp, mıllıondaǵan qaralym jınady, dep jazady Egemen.kz.
Osylaısha «Kazakh-boo» uǵymy paıda boldy. Bul termın japon mádenıetine áýes «weeaboo» sózinen shabyt alyp, Qazaqstandy «jańa, az zerttelgen jáne erekshe tartymdy mádenı baǵyt» retinde sıpattaýǵa qoldanyla bastady. Batys ınternetinde Qazaqstan «jańa Japonııa» retinde qabyldanyp, onyń mádenıeti men vızýaldy beınesine qyzyǵýshylyq artty.
Trendtiń sımvolyna aınalǵan «Ken-myrza» atty amerıkalyq qoldanýshynyń jazbalary da keń tarady. Ol óz aýlasynda kıiz úı tigip, qazaq epostaryn úırenip, Astanaǵa kóshýdi armandaıtynyn bólisken. Bul kontent áleýmettik jelilerde keń talqylandy.
Qazaqsha kontent nege trendke sırek shyǵady: Másele tilde me, formatta ma?
Qazaqstannyń tabıǵaty men zamanaýı sáýletiniń úılesimi de erekshe nazarǵa ilikti. Astananyń fýtýrıstik ǵımarattary men keń dala peızajy «kóshpeli kıberpank» estetıkasyn qalyptastyrdy. Sonymen qatar dombyra, kúı jáne dástúrli mýzyka elementteriniń elektrondy baǵytpen aralasýy jańa mádenı stıl retinde qabyldana bastady.
Batys aýdıtorııasynyń qyzyǵýshylyǵynyń artýy Qazaqstannyń buryn jahandyq pop-mádenıette az kórinýimen baılanystyrylady. Jańa mádenı izdenis aıasynda eldiń tarıhı murasy, epostary men keńistiktik ereksheligi «jańa lor» retinde baǵalanyp otyr.
Degenmen, bul qubylysqa Qazaqstan ishinde ártúrli kózqaras bar. Bir jaǵynan, mádenıetke degen qyzyǵýshylyqtyń ósýi oń baǵalansa, ekinshi jaǵynan, onyń tek estetıkalyq obrazǵa aınalyp ketý qaýpi de aıtylyp jatyr.
Sarapshylardyń pikirinshe, bul trend Qazaqstannyń shynaıy mádenıetin álemdik aýdıtorııaǵa jaqyndatýǵa múmkindik berse de, ony ústirt qabyldaý qaýpin de qatar alyp júredi.