Ábilqas Saǵynov atyndaǵy Qaraǵandy tehnıkalyq ýnıversıtetiniń bes stýdentin dıplom qorǵaǵannan keıin birden áskerı komıssarıatqa alyp ketken. Stýdentterdiń biriniń týysy shaǵymdanǵan soń, Qaraǵandy oblysynyń shaqyrý komıssııasy tekserý bastalǵanyn habarlady, dep jazady Egemen.kz.
Qaraǵandylyq Vıktorııa Ýlınıchtiń aıtýynsha, onyń inisi dıplomyn 23 mamyr kúni qorǵaǵan. Osydan keıin stýdentterge aýdıtorııadan shyǵýǵa múmkindik berilmegen, sebebi olardy áskerı komıssarıat qyzmetkerleri kútip turǵan.
«Olarǵa tańǵy saǵat onnan keıin ǵana shaqyrý qaǵazdaryn tabystady. Al qaǵazda tańǵy toǵyzda derekterdi naqtylaý úshin kelýi kerek ekeni kórsetilgen», dedi Vıktorııa Ýlınıch.
Osydan keıin jastardy áskerı komıssarıatqa aparyp, medısınalyq tekserýden ótkizgen. Qyzdyń aıtýynsha, onyń inisiniń boıyn qujatta 1,88 metr dep kórsetken, alaıda shyn máninde onyń boıy 1,95 metr. Ol muny boıy 1,90 metrden asatyn áskerı qyzmetkerlerge qosymsha tamaqtaný qarastyrylǵanymen baılanystyrýy múmkin dep esepteıdi.
Qazaqstanda áskerı oqý oryndarynyń úzdik túlekterine «aǵa leıtenant» ataǵy beriledi
Stýdentterge olardy merzimdi áskerı qyzmetke jiberý josparlanyp otyrǵany aıtylǵan. Alaıda Vıktorııanyń inisi oqýyn aıaqtaǵanǵa deıin, ıaǵnı 1 shildege deıin keıinge qaldyrý quqyǵy bar bolǵan jáne odan keıin magıstratýraǵa túspek bolǵan.
«Maǵan «ol dıplomyn qorǵap qoıdy, demek oqýyn aıaqtady» dep jaýap berdi», dedi ol.
Sondaı-aq ol áskerı komıssarıat qyzmetkerleri stýdenttiń «dıplomyn keıin de alyp úlgeretinin» aıtqanyn, al vedomstvo ókilderiniń biri qujatty úıine ózi aparyp berýge ýáde etkenin málimdedi. Aıtýynsha, onyń inisi dıplomdyq jobany tanystyrý úshin paıdalanǵan qymbat jabdyqtaryn tapsyryp úlgermegen. Onyń inisi Saran qalasynda tirkelgen jáne sol jerdegi áskerı komıssarıatqa bekitilgen. Soǵan qaramastan ony basqa stýdenttermen birge Qaraǵandy qalasyna alyp ketken, olardyń arasynda ózge qalalardan kelgen stýdentter de bolǵan.
Elimizde áskerge barý jasy 50-ge deıin uzartylýy múmkin
Oqıǵadan keıin Vıktorııa polısııaǵa aryz jazyp, Qorǵanys mınıstrligimen baılanysqan. Onyń sózinshe, mınıstrlikten keıinge qaldyrý quqyǵynyń áli de kúshinde ekeni jáne onyń inisin áskerı komıssarıatta ustap otyrýǵa eshkimniń quqyǵy joq ekeni aıtylǵan. Osydan keıin 5 stýdenttiń barlyǵy bosatylǵan. Qyz olardyń áskerı komıssarıatta bir táýlikten artyq bolǵanyn aıtty.
«Osy fakti boıynsha azamattardy merzimdi áskerı qyzmetke shaqyrý kezinde zań talaptarynyń saqtalýyn qosa alǵanda, barlyq mán-jaılardy zerdeleý maqsatynda tekserý uıymdastyryldy», dep habarlady Qaraǵandy oblysynyń shaqyrý komıssııasy.
Komıssııa ókilderi tekserý barysynda zań buzýshylyqtar nemese qyzmettik ókilettikterdi asyra paıdalaný faktileri anyqtalsa, kináliler jaýapkershilikke tartylatynyn málimdedi.
Áskerdegi jańa talap: Endi sarbaz qyzmet barysynda keminde 5 kitap oqýǵa mindetti