Sarysý aýdanynda «EvroHım-Qarataý» JShS-nyń kúkirt qyshqylyn óndiretin zaýytyn iske qosý rásimi ótti. Saltanatty sharaǵa Jambyl oblysynyń ákimi Erbol Qarashókeev pen QR ónerkásip jáne qurylys mınıstri Ersaıyn Naǵaspaev qatysty, dep habarlaıdy Egemen.kz
Jylyna 800 myń tonna kúkirt qyshqylyn óndirýge qaýqarly jańa óndiris orny – «EvroHım» kompanııasynyń zamanaýı hımııa keshenin salýǵa baǵyttalǵan aýqymdy ınvestısııalyq jobasynyń bir bóligi. Jobanyń jalpy ınvestısııalyq kólemi 1 mıllıard AQSh dollaryna deıin jetedi.
– Memleket basshysy Qasym-Jomart Toqaev óz Joldaýynda qazirgi kezeńdegi eń mańyzdy mindetterdiń biri – eldiń berik ónerkásiptik negizin qalyptastyryp, ekonomıkalyq derbestikti nyǵaıtý ekenin aıtqan bolatyn. Sondyqtan óńdeýshi sektordy jedel damytýǵa aıryqsha mán berý qajet. Bul kásiporynnyń iske qosylýy – ınvestısııanyń, zamanaýı tehnologııalardyń jáne óńirdiń óndiristik áleýetiniń naqty nátıjege ulasqanyn kórsetedi, – dedi Erbol Qarashókeev.
2026 jyldyń qańtar-sáýir aılarynyń qorytyndysy boıynsha Jambyl oblysyna tartylǵan negizgi kapıtalǵa salynǵan ınvestısııa kólemi 277,2 mıllıard teńgeni qurap, ótken jylmen salystyrǵanda 38,3 paıyzǵa artqan. Qazir óńirde jalpy quny 5,6 trıllıon teńgeni quraıtyn 116 ınvestısııalyq jobadan turatyn pýl qalyptasqan.
Bıyl jalpy quny 471 mıllıard teńge bolatyn 47 jobany júzege asyryp, myńnan astam jańa jumys ornyn ashý josparlanýda. Búginde jalpy quny 144,3 mıllıard teńgeni quraıtyn 5 joba iske qosylyp, 485 adam turaqty jumyspen qamtylǵan.
Oblys ákiminiń aıtýynsha, hımııa ónerkásibi Jambyl óńiri úshin strategııalyq mańyzǵa ıe. Respýblıkadaǵy fosforıt qorynyń 72 paıyzy oblys aýmaǵynda ornalasqan.
Qazirgi tańda óńirdiń hımııa salasynda 44 kásiporyn jumys isteıdi. Negizgi baǵyttar qatarynda fosforly shıkizat óndirý, mıneraldy tyńaıtqyshtar shyǵarý jáne ózge de hımııalyq ónimder óndirý bar. 2026 jyldyń qańtar-sáýir aılarynda oblystyń hımııa ónerkásibindegi óndiris kólemi 150,6 mıllıard teńgeni qurap, ósim 16,5 paıyz bolǵan.
«EvroHım-Qarataý» kompanııasynyń iri jobasy birneshe kezeń boıynsha júzege asýda. Alǵashqy kezeń 2016 jyly iske asyrylyp, fosforıt shıkizatyn óndirý jáne óńdeýmen aınalysatyn taý-ken baıytý kesheni paıdalanýǵa berilgen. Bul kezeńdegi ınvestısııa kólemi 126 mıllıon AQSh dollaryn qurady.
2026 jyldyń qańtar-sáýir aılarynda kásiporyn 8 mıllıard teńgeniń 344,9 myń tonna ónimin óndirgen.
Qazirgi tańda jobanyń ekinshi kezeńi boıynsha qarqyndy jumys júrgizilýde. Atap aıtqanda, mıneraldy tyńaıtqyshtar men ındýstrııalyq ónimder shyǵaratyn óndiris kesheni salynýda. Bıyl mamyr aıynda onyń alǵashqy nysany – kúkirt qyshqylyn óndiretin zaýyttyń qurylysy aıaqtaldy. Al negizgi hımııa óndirisin iske qosý 2027 jyldyń birinshi toqsanyna josparlanǵan.
Kásiporynnyń óndiristik qýaty jylyna 1 mıllıon tonnaǵa deıin ónim shyǵarýǵa múmkindik beredi.
Jobanyń basty ereksheliginiń biri – zamanaýı ári ekologııalyq qaýipsiz tehnologııalardyń qoldanylýy. Jańa óndiristiń janama ónimi retinde kalsıı hlorıdi men sıntetıkalyq gıps alynbaq. Bul ónimder túrli ónerkásip salalarynda keńinen qoldanylady.
Qurylys kezeńinde 2 myńǵa deıin adam jumyspen qamtylsa, kásiporyn tolyq iske qosylǵannan keıin keminde 1200 turaqty jumys orny ashylady dep josparlanýda. Qazirdiń ózinde «EvroHım» kásiporyndarynda myńnan astam adam eńbek etýde. Budan bólek, servıstik jáne aýtsorsıngtik uıymdarda taǵy 300-ge jýyq jumys orny qurylǵan.