Álem chempıonatynyń alǵashqy kúnderi ártúrli kóńil syılady. Uıymdastyrý jaǵy synǵa alynyp, qonaq bolyp kelgen jankúıerler aýyr jaǵdaıǵa tústi. Degenmen soǵylyp jatqan goldar men komandalardyń óneri kútkennen de artyq bolýda. Al ázirge Eýropa fýtboly ústemdik quryp turǵany anyq.
Ekaterınbýrgtegi bos trıbýnalar
Ekaterınbýrg qalasyndaǵy stadıonda ótken Mysyr men Ýrýgvaı oıynynda bos trıbýnalar boldy. Telekórsetilimde bul jaǵdaı anyq baıqalyp, álemdik baspasóz qazir Reseıdi uıymdastyrý jaǵynan synǵa aldy. Álemde kóptegen adamdar mýndıal kóre almaı, sandalyp bılet tappaı júrgende bul qalaı boldy deıdi? Onyń da birneshe jaýaby bar. Eń qarapaıymy, sol oıynnyń aldynda bıletter satylymǵa shyqqanda elektrondy qyzmetter isten shyqqan. Iаǵnı oǵan FIFA-nyń da qatysy bar. Júıeden aqaý ketip, kórermender kerekti bıletterin ala almapty. Bılet satatyn saıt qazir rettelip, qalpyna keltirildi.
Ronaldýdyń solosy
Chempıonatta bolǵan ázirge eń tartysty match Ispanııa men Portýgalııa arasynda ótti. Osynyń aldynda ótken oıyndardyń barlyǵy asa qatty tartysty bola qoımap edi. Fýtbol mamandary tipti goldar az soǵylyp jatyr, oıyndar qyzyq emes dep te qobaljı bastaǵan. Biraq Krıshtıaný Ronaldýdyń het-trıgi chempıonatty qyzdyra tústi. Alma-kezek gol soǵyp, tarazy basyn árli-berli teńseltken oıynnyń eń sońǵy esebi 3:3 boldy. Al Ronaldýdyń sońǵy mınýtta aıyp dobynan soqqan goly bıylǵy chempıonattaǵy ádemi gol bolyp tur. Árıne ýaqytsha dep seneıik.
Jýrnalıster qaýymy Ronaldýdyń bul erligin asyra jazyp, maqtaýyn kelistirip jatyr. Bıylǵy «Altyn dopty» portýgaldyq oıynshy alýy tıis dep erte bastan pikir aıtqandar da joq emes. Chempıondar lıgasyn jeńip, álem chempıonatynda da atoı salsa, «Altyn dopty» Ronaldý almaǵanda kim alsyn? Alaıda chempıonat tek endi ǵana bastaldy.
Messı múlt ketti
Ronaldý bar qyrynan kórinip Portýgalııany jalǵyz súırep júrgen soń, Messı de solaı óner kórsetýi tıis boldy. Lıonel de Argentınany alǵa jetelep shyqty. Islandııaǵa qarsy ótken oıyn yńǵaısyz ári sátsizdikpen órildi. Esep 1:1 bolyp teń aıaqtalǵanymen, Argentına bul nátıjege qanaǵattanbady. Oıyn barysynda Messı de penaltıden gol soǵa almady. Leo sońǵy tepken 7 penaltıiniń 4-in soqpady. Al jalpy alǵanda, osy birinshilikte 2 ret penaltı golǵa aınalmady. 2014 jylmen salystyrǵanda bul endigi bireýge artyq. Brazılııadaǵy chempıonatta tek bir ǵana penaltı qıys tebildi. Fransııa shabýylshysy Karım Benzema múlt ketken bolatyn.
7 jankúıerdi qaǵyp ketti
Máskeýdiń qaq ortasynda 7 jankúıerdi taksı qaǵyp ketti. Jol saqshylarynyń málimdeýinshe, taksı júrgizýshisi Qyrǵyzstan azamaty eken. Avtokóliktiń tizgininde otyrǵan ol qalǵyp ketip jol jıegine shyqqan. Sonyń saldarynan 7 jolaýshy zardap shekken. Olardyń ishinde ekeýi Meksıka quramasynyń jankúıeri ekendigi de anyqtaldy. Eń bastysy, eshkim asa qatty aýyr jaraqat almaǵan.
Qıyn jaǵdaıǵa túsken taksı júrgizýshisi oqıǵa ornynan qashyp ketken. Biraq keıinnen ustalyp, óz kinásin moınyna aldy. Polıseılerge aıtqan jalǵyz ýáji – 20 saǵat boıy uıyqtamaı, rólde bolypty.
Daıyndaǵan Ermuhamed MÁÝLEN,
«Egemen Qazaqstan»