Zaıkenovtar men Jumadilovter otbasynyń alǵan qos páterine oblystyq, qalalyq máslıhat depýtattary Qaırat Mırashev pen Albına Ahmetovalar syı-syıapat shashýlaryn jasady. Depýtat Qaırat Mırashev osy sýǵa ketken Prıstan aýdany boıynsha saılanǵandyqtan zardap tartqan turǵyndardy tolyǵymen nazarda ustap otyrǵan kórinedi.
Jumadilovter eki bólmeli páterge, Zaıkenovter úsh bólmeli páterge ıe bolypty. Olarǵa páterleriniń kiltin qala ákimi Ermak Sálimov arnaıy saltanatpen tabystady. Jumadilovter men Zaıkenovter otbasy ózderi osy aýdannan úıdi arnaıy tańdap alǵan eken. Sharaǵa qalalyq máslıhat hatshysy Beısenbek Aqjalov qatysty.
Otaǵasy Marat Zaıkenovtyń aıtýy boıynsha Shúlbi sý qoımasynan sý artyǵymen jiberilip, oǵan erigen qar sýy qosylyp, Ertis tasyǵan kezde Prıstandaǵy jer úıi 23 naýryz kúni 12.00 de bir-eki mınýttyń ishinde sý astynda qalǵan. Taksımen jetken ol balalardy syrtqa shyǵaryp, qujattaryn júgirip alýǵa ǵana shamasy keledi. Kıim keshek, azyq-túlikkti alýǵa múmkin bolmaıdy.
-Úıim jóndeýge múlde kelmeıdi,-dedi Marat Zaıkenov,-ózim qurylysshymyn ǵoı. Eshbir múmkindik joq ekendigin kórip, nede bolsa Semeıdegi Iýnost kentinen Úkimet qarajaty arqyly páter satyp alýdy jón kórdim. Dál búgingi ýaqytqa deıin «Semeı» qonaqúıinde turyp keldim.
Degenmen jańa qonystanýshylardyń kıim-keshek, azyq-túlik, dúnıe múlik, turmystyq tehnıkalary da sýǵa ketkendikten osy jaǵynan da kómek bolsa dep úmittenedi olar.
Raýshan NUǴMANBEKOVA,
SEMEI