Bıyl Almaty oblysynda jumys isteıtin úkimettik emes uıymdardy qarjylandyrý kólemi taǵy 4,6 mlrd. teńge kóbeımek. Jaqynda ótken «Asar» forýmynda 4 áleýmettik joba maquldanyp, olardyń júzege asýyna qarjylaı qoldaý jasalatyn boldy.
Jetisý jerindegi úkimettik emes uıymdar, bıznes jáne memleket arasyndaǵy áriptestiktiń altyn kópirine aınalǵan úsh jaqty yntymaqtastyq forýmy osymen ekinshi jyl qatarynan ótkizilip otyr. «Asar» forýmynda úkimettik emes uıymdar óz jobalaryn qorǵap, olardyń naqty iske asýyna múmkindik alady. Jaqsy dásıúrge aınalǵan sharanyń bıylǵy talqysyna Taldyqorǵan qalasyndaǵy «Qamqor» múgedekter qoǵamdyq birlestigi usynǵan «Sheksiz bı», «Qarasaı aýdanynan «Balataı» qoǵamdyq birlestiginiń «Murany damytamyz – týrızmdi jáne ózimizdi damytamyz» jobasy, Kerbulaq aýdandyq «Qamqor» múgedekter qoǵamynyń «Múmkindigi shekteýli jáne DSP-men aýyratyn balalarǵa arnalǵan ońaltý ortalyǵy» jobasy jáne Kóksý aýdandyq «Úsh urpaq» uıymynyń «Úsh urpaq» jobasy túsip, barlyq joba sátimen qorǵaldy.
Bul jobalar oblys boıynsha irikteýden ótken, mamandar tarapynan qoldaýǵa muqtaj bastamalar retinde tańdalyp alynǵan eken. Al jalpy forýmǵa qatysýǵa aımaqtaǵy ǵana emes, elimizdiń túkpir-túkpirindegi úkimettik emes uıymdardan eki júzden astam usynys túsken. Solardyń ishinde 141 joba iriktelgen, onyń otyz shaqtysy Almaty oblysynyń qoǵamdyq uıymdary usynǵan jobalar boldy.
«Asar» úsh jaqty yntymaqtastyq forýmynyń basty ereksheligi – jeńimpaz jobalardy qarjylandyrýǵa memleket qarjysy ǵana emes, bıznes qaýymdastyq ókilderiniń kómegine júginýge jol ashady.
Forýmǵa arnaıy qatysqan «Atameken» ulttyq palatasy Basqarma Tóraǵasynyń orynbasary Eldar Jumaǵazıevtiń aıtýynsha halyqtyn áleýmettik máselelerin sheshýge bıznestiń qatysýy men qaıyrymdylyq mádenıetin qalyptastyrý boıynsha «Atamekenniń» bastamalary keń qoldaýǵa ıe.
- Qazirgi tańda bıznes joǵary áleýmettik jaýapkershlikti kórsetip otyr. Byltyrdyń ózinde 2 myń kompanııa áleýmettik kásipkerlikti júzege asyrý maqsatynda 122 mlrd teńge qarjy jumsaǵan, - deıdi Eldar Jumaǵazıev.
Taldyqorǵan qalasynyń tórinde ótken forým jumysyna elimizdiń Din isteri jáne azamattyq qoǵam mınıstri Darhan Qaletaev, «Atameken» ulttyq palatasy Basqarma Tóraǵasynyń orynbasary Eldar Jumaǵazıev Almaty oblysy ákiminiń orynbasary Jaqsylyq Omar, sonymen qatar bıznes-qoǵamdastyq, memlekettik qurylymdar, otandyq jáne halyqaralyq úkimettik emes uıymdardyń 300-ge tarta ókili qatysty.
Qalmahanbet MUQAMETQALI,
«Egemen Qazaqstan»
Almaty oblysy