10 qańtar – Qazaqstan Prezıdentiniń kezekti saılaýy ótip, 5 846 817 saılaýshynyń daýysyn jınaǵan N.Á.Nazarbaev jeńiske jetti.
18 qańtar – Astana qalasynda halyqaralyq bilim standartyna saı «Mıras» halyqaralyq mektebiniń alǵashqy irgetasy qalandy. Oǵan Elbasy Nursultan Nazarbaevtyń ózi qatysyp, jınalǵan kópshilikke, irgesi qalanyp jatqan mektepte elimizdegi eń daryndy, zerek balalar oqıtyn bolady, degen edi. Bul mektep qazir halyqaralyq Bakalavrıat (IB), bastaýysh (PYP), negizgi (MYP) jáne joǵarǵy (DP) mektep baǵdarlamalary boıynsha avtorızasııadan ótken tuńǵysh oqý orny retinde belgili.
20 qańtar – N.Á.Nazarbaevtyń Qazaqstan Respýblıkasynyń Prezıdenti laýazymyna kirisýine baılanysty ınaýgýrasııalyq – ulyqtaý saltanaty Kongress-holda (qazirgi «Astana» konsert zaly) ótkizildi. Ortalyq saılaý komıssııasynyń tóraıymy Zaǵıpa Balıeva saltanatty jaǵdaıda Qazaqstan Respýblıkasy Prezıdentiniń kýáligin tapsyrdy. Elbasy ata-baba jolymen aq kıizdiń ústinde turyp ant berdi. Odan keıin halyqqa óziniń júrekjardy lebizin jetkizdi.
20 aqpan – elimizdiń bas basylymy «Egemen Qazaqstan» gazeti elordaǵa qonys aýdardy. Ujymdy ulttyq baspasóz bahadúri Sherhan Murtaza men sol kezdegi basylym basshysy Erjuman Smaıyl bastap keldi. Osy bir tarıhı sáttiń mańyzy jaıly Sherhan aǵamyz: «Astanaǵa tek «Egemen Qazaqstan» gazeti kóship kelgen joq, onymen birge Sáken, Turar, Smaǵul, Ǵabıt sııaqty ulylar rýhy oraldy» dedi.
13 naýryz – Mysyr eliniń ortalyǵy álemdegi eń kóne shahardyń biri Kaır qalasy men ǵalamnyń jańa shári Astana arasynda dostyq pen yntymaqtastyq týraly kelisimge qol qoıylyp, osy oqıǵamen qanattas perǵaýyndar eliniń astanasyndaǵy bir kóshege Abaıdyń aty berildi.
8 sáýir – Buǵan deıin el astanasy jáne oblys ortalyǵy retinde qatar tanylyp kelgen Astanaǵa jeke mártebe berý úshin Qazaqstan Respýblıkasynyń Prezıdenti Nursultan Nazarbaev sheshim qabyldap, Aqmola oblysynyń ákimshilik ortalyǵyn Astana qalasynan Kókshetaý qalasyna kóshirildi. Sonymen qatar osy kúni Astana atyna laıyq jańa áýejaıdyń qurylysy aıaqtalyp, onyń ashylý saltanaty ótti.
29 sáýir – Astana qalasynda tuńǵysh ret respýblıkalyq dárejede aqyndar aıtysy bastaldy. Memlekettik hatshy Ábish Kekilbaevtyń alqaý batasymen bastalǵan sóz saıysyna eskikóz aqyndar Kóken Shákeev, Qalıhan Altynbaev bastaǵan 22 júırik qatysty. Bas júldege tigilgen jeńil kólik qostanaılyq jyr zergeri Ásııa Berkenovaǵa buıyrdy.
23 mamyr – Elorda tórinde alǵash ret «Astana arýy» baıqaýy ótti. Buǵan ár taraptan iriktelip alynǵan 17-25 jas aralyǵyndaǵy 30 boıjetken qatysyp, qazylar alqasy bas qalanyń baıyrǵy mektebi Jambyl atyndaǵy №4 qazaq gımnazııasynyń 10 synyp oqýshysy Aınur Ismaılovany jeńimpaz dep tanydy.
10 maýsym – Astana qalasy bir jyldyq merekesin saltanatpen atap ótti. Osy sharamen oraılastyryp Elbasy Nursultan Nazarbaev qalada shaǵyn jáne orta kásipkerlikti damytý maqsatynda aksııalarynyń 90 paıyzy memleket menshiginde bolatyn Tehnopark ashty.
15 shilde – Memleket basshysy Nursultan Nazarbaev elimizge resmı saparmen kelgen Moldova Respýblıkasynyń prezıdenti Petr Lýchınskıımen kezdesip, oǵan qalalyq máslıhattyń sheshimimen «Astana qalasynyń Qurmetti azamaty» ataǵyn berildi.
16 shilde – Bolıvııa astanasy La-Pas qalasynda IýNESKO-nyń sheshimimen elordaǵa «Qalalar beıbitshilik úshin» syılyǵy berildi. Osy ýaqyttan bastap Qazaqstannyń astanasy «Beıbitshilik qalasy» dep atalady.
28 shilde – Astana qalasynda «SOS Kinderdorf International» halyqaralyq qorynyń qoldaýymen tórt gektar aýmaqty alyp jatqan otbasylyq úlgidegi 12 úıli balabaqsha tıptes medısıalyq ortalyq paıdalanýǵa berildi.
6 tamyz – Q.Muńaıtpasov atyndaǵy Ortalyq stadıonda jalpyhalyqtyq mádenı shara uıymdastyrylyp, ol jyr alyby – Jambyldyń nemeresi Álimqul aqsaqaldyń jyr-batasymen ashyldy.
7 tamyz – Astanada Elbasy Nursultan Nazarbaevtyń qatysýymen golf klýby ashylyp, Memleket basshysy alǵashqy dopty soǵý rásimin jasady.
1 qyrkúıek – Bilim kúnine oraı Q.Muńaıtpasov atyndaǵy ortalyq stadıonda Elbasy Nursultan Nazarbaev osy jyly mektep tabaldyryǵyn attaýǵa tıis baldyrǵandarmen kezdesti.
19 qarasha – Qalalyq máslıhattyń sheshimimen áıgili ánshi Bıbigúl Tólegenovaǵa «Astana qalasynyń Qurmetti azamaty» ataǵy berildi.
15 jeltoqsan – Táýelsizdik merekesi qarsańynda elordanyń Abaı jáne Jeńis dańǵyldary qıylysynda aýmaǵy 32 myń sharshy metr, 12 qabattan turatyn Qarjy mınıstrliginiń sáýleti de eńseli ǵımaraty paıdalanýǵa berilip, sharaǵa Elbasynyń ózi kelip qatysty.
Daıyndaǵan Beken QAIRATULY,
«Egemen Qazaqstan»