Elordada kóshe óneriniń ASTANA Street Art festıvali ótip jatyr. Shara aıasynda jas sýretshilerden quralǵan bes komanda óz týyndylaryn ǵımarattardyń qabyrǵasyna salýda. Atalmysh jobany Astana qalasynyń Mádenıet jáne sport basqarmasy «Qulanshy» qazirgi zamanǵy óner ortalyǵymen birge qolǵa alyp otyr.
«Búginde graffıtı – beıresmı óner ǵana emes, tutastaı mádenı bir baǵyt. Bir kezderi osyndaı sýretter zańsyz bolyp sanalǵan, al endi olardy Nıý-Iork, London, Parıj, Máskeý sekildi álemniń iri qalalarynda tarıhı ǵımarattardyń qasbetterinen kóre alamyz. Bul sýretter Astanany ajarlandyra túspek», dedi Astana qalasynyń Mádenıet jáne sport basqarmasynyń basshysy Bolat Majaǵulov.
ASTANA Street Art jobasyna qatysatyn sýretshiler shaǵyn ballondardy, sondaı-aq dástúrli qasbettik boıaýlardy paıdalanady. Bul jaı graffıtı emes, naǵyz óner. Sýretshiler óz eńbekterin Astananyń 20 jyldyǵyna arnap, shyǵarmashylyqtary arqyly jergilikti turǵyndarǵa qýanysh syılamaq.
«Jas sýretshiler úshin bul – úlken tájirıbe. Bul rette keneptiń ornyna qalalyq ǵımarattardyń qasbetterin paıdalaný – eles-qııalyńa erik berip, qalaǵanyńdy salýǵa múmkindik beredi ári óz sýretińniń Astananyń kórkin keltirip, qala turǵyndaryna qýanysh syılaıtynyn bilesiń», dedi «Qulanshy» qazirgi zamanǵy óner ortalyǵynyń art-dırektory Aıgúl Tegjanova.
Jumystardyń basym bóliginen qazaq halqynyń ereksheligin baıqaýǵa bolady. Mysaly, Kenesary kóshesindegi №63 úıde kıiz úıdiń janynda turǵan qazaq qyzy beınelengen. Kartına «Yqylas» dep atalady.
Qolyna qyzǵaldaq ustaǵan ulttyq kıimdegi qyz Respýblıka dańǵyly, 34/2 mekenjaıynda ornalasqan úıde salyndy.
Qazaq mádenıetinde jylqy márttiktiń, adaldyqtyń, sulýlyq pen aqyldylyqtyń belgisi bolyp tabylady. Abaı dańǵylyndaǵy 67-shi úıde jarqyraǵan aı men jylqynyń basy beınelengen.
Kúıshi Dına kóshesindegi 15-shi úıdiń qabyrǵasynan báıgeniń sýretin kórýge bolady. Bul sýrettegi barlyq emosııa pishinder men tústerdiń ekspressııasy arqyly jetkiziledi.
Baraev kóshesindegi 6/1 nómirli ǵımarattan erekshe kartınany tamashalaýǵa bolady. 3D áserimen salynǵan sýrette megapolıstegi ómir beınelengen.
«Egemen-aqparat»