Qaraǵandydaǵy kenshiler mádenıeti saraıynyń aldynda 1 shilde – Ulttyq dombyra kúni qurmetine 150-den astam ónerpaz qatysqan konserttik baǵdarlama ótti.
Oblystyq mádenıet, muraǵattar jáne qujattama basqarmasy uıymdastyrǵan mádenı sharada Táttimbet atyndaǵy akademııalyq halyq aspaptary orkestri men «Arqa sazy» folklorlyq ansambli jáne qaladaǵy óner mektepterinde oqıtyn jas dombyrashylar óner kórsetti. Orkestrge Qazaqstannyń eńbek sińirgen qaıratkeri Dúısen Úkibaı dırıjerlik etti.
Orkestrdiń oryndaýyndaǵy Táttimbettiń «Saryjaılaýy», Qurmanǵazynyń «Saryarqasy» jáne basqa da áıgili kúıler jıylǵan qaýymnyń jan álemin shýaqqa, kenshiler qalasynyń aspanyn shattyqqa bóledi.
«Dombyra kúni, ásirese mýzykanttar úshin mańyzy zor mereke bolmaq. Nege deseńiz, dombyra – halyq shyǵarmashylyǵynyń qaınar bulaǵy, ol baǵzy zamandardan qazaq halqymen birge jasasyp kele jatqan qasıetti aspap. Sondyqtan, ol óziniń menshikti merekesiniń bolýyna ábden eńbegi sińgen asyl mura. Odan beride, dombyra mýzyka tarıhynyń tereńinen tamyr tartqan ulttyq sımvol», deıdi dırıjer Dúısen Úkibaı.
Birneshe óner ujymynan, jasy bar, jasamysy bar ondaǵan dombyrashydan aıaqasty quralǵan orkestrdiń usynýyndaǵy ulttyq mýzyka ónerindegi nebir jaýhar dúnıelerdiń oryndalý sapasyna syn aıtqan adam balasy bolmady. Qaıta bul keshtiń kýási bolǵan qala turǵyndary men qonaqtarynyń úıdi-úıine qasıetti ónerdiń qudiretimen rýhtanyp, qanattanyp qaıtqany sózsiz edi.
Qaırat ÁBILDA,
«Egemen Qazaqstan»
QARAǴANDY