Qyzylorda qalasynda «Rýhanı jańǵyrý» baǵdarlamasynyń aıasynda Ulttyq dombyra kúni atap ótildi.
Oblystyq bilim basqarmasy muryndyq bolǵan aıtýly shara «Jibek joly» oıyn-saýyqtyrý ortalyǵynda boldy. Memleket Basshysy Nursultan Nazarbaev: «Dombyra qazaqtyń jan dúnıesimen baılanysty. Kúıdi, dombyranyń áýenin, sazyn murnyna jýsan ıisi barǵan ári Uly dala tósinde ómirge kelgen qazaq qana túsine alady. Sebebi bul erekshe mýzyka adamnyń jan dúnıesin kórsetedi, ıaǵnı muńdy nemese qýanyshty, oıdy ashyq baıqatady. Keshkilik dombyrany shertip otyrǵan kezde barlyǵy umytylady. Maǵan bul áser unaıdy, sondaı-aq dombyrada jaqsy oınaıtyn adamdarǵa qurmetpen qaraımyn. Bizdiń qazaq halyq ánderi men jyrlary adamnyń jan-sezimin tolqytady, olarda fılosofııalyq mazmun bar. Qazaq ánderi men jyrlarynda mýzykaǵa emes, ondaǵy sózderge mán berý kerek. Bul sózderdiń máni óte tereńde jatyr jáne olardyń úlken mańyzy bar», - degen edi.
Merekelik is-shara baǵdarlamasynda dombyrashylar ansamblderinen qazaq kúıshileriniń shyǵarmalarynan popýrrı, termeler, kúıler, trıo ansamblderinen ánder oryndaldy.
Baqtııar TAIJAN,
«Egemen Qazaqstan».
QYZYLORDA OBLYSY.