Ulttyq dombyra kúni Atyraýda da aıryqsha saltanatpen atap ótilip jatyr. Oblys ortalyǵynda «Dombyra-ata kózi, baba mura» atty festıval bastaldy.
«Ulttyq dombyra kúni – naǵyz rýhanı merekemiz. Ata-babalarymyz ejelden beri dombyramen ánin asqaqtatyp, kúıin kúmbirletken. Árkez osy ulttyq aspabymyzdy kıeli sanap, úkilep tórine ilgen. Osy úrdis búginge deıin mánin joıǵan joq. Batys óńirindegi dástúrli án mektebiniń, kúı mektebiniń oryny bólek», - dedi sharada sóz alǵan oblys ákiminiń birinshi orynbasary Serik Shapkenov.
Festıval aıasynda oblystyq tarıhı-ólketaný mýzeıi qorynan kórme uıymdastyryldy, oǵan kúı anasy Dına Núrpeıisovanyń, dáýlesker kúıshi Qarshyǵa Ahmedııarovtyń, kúıshi M.Dáýletovtyń, Mahambet syılyǵynyń laýreaty S.Ǵabbasovtyń, aqyn-jazýshylar Hamıt Erǵalıev, Berqaıyr Amanshın, Aqseleý Seıdimbekovtiń, basqa da kúıshilerdiń dombyralary qoıyldy.
«Festıvalge aýdandardan ónerpazdar arnaıy kelip qatysyp otyr. Dına Nurpeıisova atyndaǵy Atyraý mýzyka kolledjiniń stýdentteri, óner mektepteriniń muǵalimderi men oqýshylary, barlyǵy 150 dombyrashy óner kórsetti», - deıdi oblystyq halyq shyǵarmashylyǵy ortalyǵynyń basshysy Baqytbek Sartbaev.
Sondaı-aq, búgin dúnıege kelgen atyraýlyq sábılerge dombyra tartý etildi. Qazaqstan halqy Assambleıasynyń oblystyq fılıaly «Babalardyń kózindeı qasıetti dombyra» atty aksııa ótkizdi. Atyraý oblysy Qazaqstan halqy Assambleıa tóraǵasynyń orynbasary, hatshylyq meńgerýshisi Gúlmıra Shákirova oblystyq perınataldyq ortalyqqa baryp, analardy Ulttyq dombyra kúnimen quttyqtady.
Baqytgúl BABASh,
«Egemen Qazaqstan».
ATYRAÝ.