Elimizde tuńǵysh toılanyp otyrǵan Ulttyq dombyra kúni merekesi oraı Qostanaı qalasyndaǵy perınataldyq ortalyqtarda jáne aýdandar men qalalardaǵy perzenthana úılerinde «Balalardyń kózindeı qasıetti Dombyra» atty aksııa ótti.
Qostanaı qalalyq perınataldyq ortalyqqa Anastasııa Birjanova túngi saǵat 24.00-te túsken bolatyn. Áýlıekólde turatyn kelinshek týystarynyń úıine qydyryp kelgen eken. Aıy-kúni jaqyn bolsa da úıine qaıtyp, aýdan ortalyǵyndaǵy perzenthanada bosanaryna senimdi kelgen Anastasııany túnde tolǵaqt qysa bastaǵan soń, «Jedel-járdem» qyzmeti dereý qalalyq perınataldyq ortalyqqa jetkizgen bolatyn. Kelgen soń birer saǵattan keıin-aq Birjanovtar otbasy taǵy da qyzdy boldy. Salmaǵy 2 kılogramm 620 gramm bolyp týǵan náresteniń densaýlyǵy jaqsy, anasy da aman emes baýyryn jıdy. Dárigerler de qýanyshty. Anastasııa men Seriktiń budan buryn Ermurat jáne Kámıla degen bir ul, bir qyzy bar. «Dombyra kúni týǵan qyz, mýzykant ómirge keldi!» dep quttyqtady jas anany perınataldyq ortalyqtyń bas dárigeri Tatıana Borısovna Býlgasevıch.
Dárigerler ádettegideı uıyqtaǵan joq. Tań ata ómirge Polına atty taǵy bir náreste keldi. Bul Ekaterına I vanovanyń tula boıy tuńǵyshy. Salmaǵy 3 kılogramm 160 gramm bolyp týǵan shekesi torsyqtaı bala Ivanovtar áýletiniń qýanyshyna aınaldy.
– Búkil ýaıym, qınalǵanym artta qaldy. Elbasy bastamasymen toılanyp jatqan dombyra merekesi qasıetti kún dep esepteımin. Qyzym baqytty bolsyn dep tileımin, – deıdi Ekaterına qýanysh jasyn súrtip.
Perınataldyq ortalyqtyń kire beris bólmesi ulttyq sıpatta bezendirilipti. Perınataldyq ortalyqtyń bas dárigeri Tatıana Býlgasevıch, oblystyń bas gınekolog-dárigeri Ivan Iаnsen jáne Qazaqstan halqy oblystyq assambleıasy hatshylyǵynyń meńgerýshisi Bıbigúl Aqqojına jańa týǵan qos nárestege dombyra jáne jas analarǵa Quttyqtaý hat tapsyrdy.
Búgin mereke kúni Qostanaı qalalyq perınataldyq ortalyqta alty náreste dúnıege keldi. Oblystyń aýdandary men qalalaryndaǵy perzenthanalarda dúnıege kelgen nárestelerge de osyndaı qurmet kórsetildi.
Názıra JÁRIMBET,
«Egemen Qazaqstan»
Qostanaı