Batys Qazaqstan oblysynyń ákimi Altaı Kólginov bastaǵan delegasııa Tatarstan Respýblıkasynyń astanasy Qazan qalasynda bolyp, Tatarstan Prezıdenti R.N.Mınnıhanovpen kezdesti. Sapardyń maqsaty – saýda-ekonomıkalyq jáne ınvestısııalyq yntymaqtastyqty odan ári nyǵaıtý.
- Qazaqstan men Reseı memleketteriniń qarym-qatynasy dástúrli túrde joǵary deńgeıde, strategııalyq áriptes sanalady. Reseı – Qazaqstannyń eń iri saýda áriptesi. Osyndaı tyǵyz qarym-qatynasty damytýda Tatarstan Respýblıkasynyń da úlesi zor. Jaqynda ǵana Elbasymyz Nursultan Nazarbaev Qazan qalasynda boldy. Bul sapar bizdiń áriptestigimizdiń barlyq salasyna jańa serpin beredi», - dedi óńir basshysy Altaı Kólginov.
О́ńir basshysynyń aıtýynsha, 2017 jyly Qazaqstan men Tatarstan arasyndaǵy taýar aınalymy 700 mln. AQSh dollardy quraǵan. Munyń 100 mln. AQSh dollardan astamy – Batys Qazaqstan oblysynyń úlesinde.
Árıne, ekijaqty kezdesýde batysqazaqstandyqtar Aq Jaıyq óńiriniń ekonomıkalyq áleýeti men ınvestısııalyq múmkindikteri týraly jan-jaqty tanystyrdy.
Qazaq-tatar kásipkerlik qarym-qatynasy qazirdiń ózinde jaman emes dedik. Máselen, Oraldaǵy «Jelaev nan ónimderi» kombınaty «Tat-spaıs» kompanııasyna un jáne makaron ónimderin berip keledi. «Nurjanar» kompanııasy «TAT Krahmal patoka» kompanııasynan kvasty óndirýge qajetti ónim alady. «Oral transformator zaýyty» da plastıkalyq qubyr, polımerlik tabandyq, kran-balkalardy Tatarstannan alyp jatyr. «Gıdromash Orıon-MJBK» kompanııasy beton aralastyrǵysh torabyna qajetti dozatorlardy, «Kama Qazaqstan» kompanııasy avtokólik shınasyn tatar aǵaıyndardan jetkizedi. Batysqazaqstandyq kásipkerler tarapynan usynylatyn bıznes-jobalar da az emes. Qazandaǵy kezdesýlerde osyndaı birneshe joba tanystyrylyp, Tatarstan tarapynan tolyq qoldaýǵa ıe boldy.
Árıne, túbi bir týys, dini bir qandas aǵaıynǵa ortaq qundylyqtardy ulyqtaǵanǵa ne jetsin? Qudaıǵa shúkir, mundaı toǵysar núkte az emes. Máselen, tatar ádebıetiniń klassıgi Qazanǵa da, Oralǵa da ortaq. Tatar topyraǵynda dúnıege kelgenimen, qazaq jerinde ósti, bilim aldy, tanyldy. Búginde Batys Qazaqstan oblysyndaǵy tatar dıasporasy – óńirdegi kóp sandy, shyǵarmashyl belsendi toptyń biri. Olar óz ultynyń dástúrli meıramdaryn únemi ótkizip otyrady. Altaı Kólginov Tatarstan Respýblıkasynyń Prezıdenti Rýstam Mınnıhanovty qyrkúıek aıynda Oral qalasynda ótetin Saban toıǵa arnaıy shaqyrdy.
Qazbek QUTTYMURATULY,
«Egemen Qazaqstan»
Batys Qazaqstan oblysy