Ortalyq kommýnıkasııalar qyzmetinde ulttyq biryńǵaı testileý qorytyndysyna arnalǵan baspasóz máslıhaty ótti. Jıynǵa qatysqan «Ulttyq testileý ortalyǵy» RMQK dırektory Ramazan Álimqulov UBT qalypty jáne shtattyq rejimde ótkenin málimdedi.
«О́zderińizge málim, bıyl ulttyq biryńǵaı testileý 167 bekette ótti. Onyń ishinde 3 beket – kolledj bazasynda, 116 beket – mektep bazasynda jáne 48 beket joǵary oqý oryndarynyń bazasynda ornalasty. Jalpy, ótinishterdiń sany – 102 447, onyń ishinde 77 224 (75 paıyz) qazaq tilinde, 25 177 orys tilinde (25 paıyz) jáne 46 ótinish aǵylshyn tilinde boldy», dedi R.Álimqulov.
Bıyl birinshi ret ulttyq biryńǵaı testileýdi aǵylshyn tilinde tapsyrýǵa múmkindik týdy. Negizi, aǵylshyn tilinen túsken 46 ótinishtiń ishinde 28 mektep bitirýshi ǵana testileýge kirdi. Olardyń ishinde Astanadan – 5, Atyraýdan – 7, Shymkentten 6 túlek jáne basqa da qalalardan qatysqan. Ortasha ball – 84,5, al aǵylshyn tilinde tapsyrǵandarda 85 ball boldy. Bul test nusqaýlary jáne sapasynyń durystyǵyn kórsetedi.
«Naqty statıstıkaǵa kelsek, ótinish bergen 102 447 mektep bitirýshiniń ishinen 98 698 adam ulttyq biryńǵaı testileýge qatysty. Bul 96 paıyzdy quraıdy. Atalǵan kórsetkish byltyr 95 paıyz bolǵan. Iаǵnı qatysýshylardyń sany 1 paıyzǵa óskenin baıqaımyz. Shekti baldy alǵan túlekterdiń sany – 84 065. Bul 85 paıyzdy quraıdy. О́kinishke qaraı, shekti baldy almaǵandardyń sany – 14 633. Iаǵnı 14 paıyz. Byltyrǵy statıstıkamen salystyrǵan kezde shekti baldan ótkenderdiń sany 1 paıyzǵa ósken. Sondaı-aq 9 túlektiń UBT nátıjesi joqqa shyǵaryldy. Qazaqstan boıynsha ortasha ball – 83,1. Byltyr bul kórsetkish 80,5 ball bolǵan», dedi ol.
Bıyl eń joǵary 140 baldy Almaty qalasynyń túlegi aldy. Ol – Shıara Qudaıbergenova. Boıjetken testileý synaǵyn 25 maýsym kúni Qazaq ulttyq agrarlyq ýnıversıtetinde tapsyrdy.
Sonymen birge ortalyq basshysy UBT-ny tapsyra almaǵan túlekterge ekinshi múmkindik beriletindigin jetkizdi.
«Olar 25 shilde men 3 tamyz aralyǵynda UBT-ny ekinshi ret tapsyrýǵa ótinish bere alady. Emtıhandy tapsyra almaǵandar 15 tamyz ben 19 tamyz aralyǵynda UBT-ny qaıta tapsyrady. Eger odan ótpeı qalsa, onda qysta qaıtadan ótinish berip tapsyra alady», dedi R.Álimqulov.
Raýan QAIDAR,
«Egemen Qazaqstan»