Aqtóbe aımaǵynda Elordanyń 20 jyldyǵy qurmetine oraı 3 myńǵa jýyq is-shara uıymdastyrý kózdelgen. Bular negizinen taqyryptyq konferensııalar men sımpozıýmdar, sporttyq básekeler men óner juldyzdarynyń konsertteri. Munyń syrtynda «20 ıgi is» degen taqyryppen ótkizilgen qaıyrymdylyq sharalary jasy ulǵaıǵan jáne múmkindigi shekteýli jandarǵa, tabysy az kóp balaly otbasylarǵa moraldyq jáne materıaldyq turǵydan qoldaý kórsetýge baǵyttaldy.
Budan bólek «Qutty meken Aqtóbeden – araıly Astanaǵa» degen taqyryppen uıymdastyrylǵan avtokerýenniń orny da, joly da bólek boldy dep aıtýǵa tolyq negiz bar. Atalǵan avtokerýen óziniń baǵytyn 25 maýsym kúni Qyzylordaǵa qaraı burǵan edi. Onyń quramyndaǵy qoǵam, mádenıet pen óner qaıratkerleri, ǵalymdar men jastar ókilderi bir apta boıy el-jurtpen emen-jarqyn pikir alysyp Astananyń abyroıyn asqaqtatty. Olar Qyzylorda, Túrkistan, Jambyl, Qaraǵandy oblystarynyń ortalyqtarynda jáne Almaty men Jambyl qalalarynda bolǵan kezdesýlerde elimizdiń júregi Astana týraly tartymdy áńgimeler órbitti.
«Astana – tutastaı el óńirleriniń ósip órkendeýine basty temirqazyq bola alatyny jóninde óreli oı-pikirler sabaqtady. Astanaǵa qarap oı túzeý de, Astanaǵa qarap boı túzeý de jastarǵa ábden jarasady. Sondyqtan da avtokerýen quramynda jastardyń kóbirek bolýyna kóńil bólindi», dedi atalǵan mándi de mańyzdy mádenı kópshilik sharanyń basy-qasynda júrgen Aqtóbe oblystyq mádenıet, arhıvter jáne qujattama basqarmasynyń basshysy Marjan Qorǵanbaeva.
Avtokerýen atalǵan ýaqyt aralyǵynda elimizdiń 11 eldi-mekeninde bolyp, el-jurt pen Astana arasyndaǵy baılanystar men qarym-qatynastardyń jaqyndaı túsýine yqpal etti. Avtokerýen 5170 shaqyrym joldy artqa tastap, shildeniń alǵashqy kúninde Astana qalasyna jetti. Sol kúni aqtóbelik óner sheberleri Elordanyń tórinde úlken merekelik konsert qoıdy.
Temir Qusaıyn
«Egemen Qazaqstan»