Búgin «Balapan» telearnasy Dármen Sádýaqasovtyń shahmat Akademııasymen birigip «Shahmat patshalyǵy» dep atalatyn 3D formatyndaǵy anımasııalyq serıaldy tanystyrady. Bul týraly Aqparat jáne kommýnıkasııalar mınıstri Dáýren Abaev Feısbýktegi paraqshasynda jazdy.
"Shahmat – adamzattyń ejelden kele jatqan ǵajap tabystarynyń biri. Kópshilik áli kúnge deıin shahmatty sport túri, óner nemese ǵylym dep bástesip jatqanyn baıqap qalamyz. О́ıtkeni bul oıyn san qyrly ereksheligimen ózine birden baýrap alady.
Ol adamdy jeńiske jigerlendirip, sporttyq tabandylyǵyn qalyptastyrady. Aldyńyzdaǵy 64 sharshy taqtadaǵy ondaǵan júristiń árbirin eseptep, múmkindigińizdi múlt jibermeýge tyrysasyz. Bul shahmat taqtasyndaǵy ǵana emes ómirdegi qadamdaryńyzdyń da oń bolýyna yqpal etedi. Osylaısha ósip kele jatqan urpaqty shahmatqa baýlý bizdiń elimiz úshin de óte mańyzdy", deı kele Dáýren Abaev búgin «Balapan» telearnasynyń Dármen Sádýaqasovtyń shahmat Akademııasymen birigip «Shahmat patshalyǵy» dep atalatyn 3D formatyndaǵy anımasııalyq serıaldy tanystyratynyn jazdy.
"32 serııadan turatyn joba balalarǵa jeńil ári túsinikti formada shahmat tarıhy, taqtadaǵy tastardyń ataýy, oıyn erejesi, oıynnyń taktıkasy men strategııasy týraly tolyq aqparat beredi.
«Shahmat patshalyǵy» serıaly jasóspirim kórermenderimizge tańǵajaıyp ári tanymdyq saıahatqa shyqqandaı áser syılaıtynyna senemin. Sananyń sergek júrýine paıdasyn tıgizetin osyndaı oıyndardy kóptep ıgerý jolynda senderge sáttilik tileımin!", dep jazdy Aqparat jáne kommýnıkasııalar mınıstri.