Syrdarııa aýdanynda 2018 jyly 725 jańa jumys orny ashylý kerek bolatyn. Aýdan ákimi Ǵanıbek Qazantaev qazir 283-iniń ashylǵanyn, jyl sońyna deıin 423 jumys ornyn kútip otyrǵandyǵyn aıtady. Sonda aýdanda jumyssyzdyq deńgeıi 5,1 paıyzdan 4,9 paıyzǵa tómendeıdi eken.
Syrdarııa aýdanynyń 2017-2021 jyldarǵa arnalǵan «Damý» baǵdarlamasyna sáıkes quny 259,3 mln.teńgeniń 35 kásipkerlik jobalarynyń iske qosylýy josparlansa, búgingi kúnge 63,3 mln.teńgeniń 15 jobasy iske qosylǵan. Bul jobalar negizinen kásipkerlerdiń óz qarajattary esebinen júrgizilýde. Sonyń nátıjesinde Tereńózek kentinde «Eko qurylys Prodjekt» JShS-niń quny 11 mln teńgeniń Qalǵandarııa kólinde jaǵajaı jobasy, «Syr marjany» JShS-giniń quny 40 mln. teńgeni quraıtyn kúrish aqtaý sehy sııaqty jobalar iske qosylyp, halyqqa qyzmet kórsetip jatyr. Sonymen qatar, «Ýglesbyt» JShS-niń Tereńózek-Qyzylorda avtotrassasynyń boıynan «Mal bordaqylaý alańyn ashý» jobasynyń qurylysy bastalyp ketti.
Baqtııar TAIJAN,
«Egemen Qazaqstan»
Qyzylorda oblysy