Bishkektegi Qyrǵyz Ulttyq ǵylym akademııasynda qyrǵyz eliniń qoǵam qaıratkeri, kórnekti qalamger Osmanaqýn Ibraımovtyń orys tilinde jaryq kórgen «Aıtmatov ımperııanyń sońǵy jazýshysy» atty sý jańa kitabynyń tanystyrylymy ótti. «Adamzattyń Aıtmatovy» atanǵan zańǵar jazýshy Shyńǵys Tóreqululynyń shyǵarmashylyq qyry men ómir syrynan habar beretin aıtýly eńbek Halyqaralyq Túrki akademııasynyń qoldaýymen jaryq kórip otyr.
Baýyrlas elde bıyl Shyńǵys Aıtmatovtyń 90-jyldyq mereıtoıy keń kólemde atap ótilmek. Mereıli merekege ázirlik jumystary ázirden-aq bastalyp ketken. Atalǵan eńbek sol mereıtoıǵa jasalǵan tartý dep te ataýǵa bolady. Kitapta Aıtmatovtyń ómirlik ónegesi, kópshilikke beımálim qyrlary túsinikti ári kórkem tilde áserli áńgimelenedi. Bir sózben aıtqanda, qaıratker qalamgerdiń balalyqtan danalyqqa deıingi júrip ótken joldaryn osy eńbektiń aıasynan tabasyz. Túrki akademııasynyń prezıdenti Darhan Qydyráli adamzatqa ortaq tulǵa Aıtmatov muralaryn zertteý túbi bir týysqan halyqtardyń arasyndaǵy rýhanı sabaqtastyq pen ádebı baılanystardy odan ári nyǵaıtatynyn aıtyp, Ospanqul Ibraımovtyń atalmysh eńbegi osy maqsattyń údesinen shyǵa alatyn tanymdyq týyndy ekenin jetkizdi.
– Túrki akademııasy Aıtmatovtyń aıtqandaryn amanat retinde qabyldap, osy baǵyttarda irgeli jumystar bastap ketti. Shoqtyǵy bıik shyǵarmalary arqyly adamzattyq máselelerdi kótergen zańǵar jazýshynyń mol murasy túbi bir túrki jurtyn máńgilik murattar tóńireginde toptastyrýǵa qyzmet etedi dep senemiz, – dedi Darhan Qydyráli.
Shara barysynda jazýshynyń inisi qyrǵyz eline belgili geolog Ilgız Aıtmatov pen qaryndasy Roza Aıtmatova esten ketpes estelikterimen bólisse, jazýshy-drammatýrg Sultan Raev, akademık Abdyldajan Akmatalıev, arheolog Jumabek Tentıev jáne Abydganı Erkebaev, Jýmagul Saadanbekov , taǵy basqa da ǵalymdar men ádebıetshiler arnaıy baıandama jasady.
Kitap avtory Ospanqul Ibraımov: «Uly jazýshynyń azamattyq bolmysyn, shyǵarmashylyq qýatyn, qaıtalanbas ómir órnekterin, kózi tirisinde onymen rýhanı baılanysta bolǵan adam retinde qalamyma tutas syıǵyzýǵa tyrystym. Eńbegimdi baǵalap, oqyrmanǵa jol tartýyna demeý bolǵan Túrki akademııasyna aıtar alǵysym sheksiz» deıdi.
Baýyrlas elderdi rýh bıiginde biriktirgen aıtýly sharaǵa el jazýshylary atynan Beken Ybyraıymov, Jumabaı Shashtaıuly, Nurǵalı Oraz syndy qabyrǵaly qalamgerler qatysty. Qyrǵyz ǵylym akademııasynyń prezıdenti, akademık Murat Jumataev bastaǵan qyrǵyz eliniń zııaly qaýym ókilderi týystyq týyn bıikke kóterip, baıandy iske bastamashy bolǵany úshin barsha qazaq halqyna jáne Halyqaralyq Túrki akademııasyna rızashylyǵyn bildirdi.
Arman OKTIаBR,
«Egemen Qazaqstan»