Jezqazǵandaǵy jylý elektr ortalyǵynda táýelsizdik alǵaly bergi tarıhta alǵash ret qýattylyǵy 50 MVt №8 jańa týrbına iske qosyldy. Ol qala turǵyndaryn qajetti jylý energııasymen qamtamasyz etip, stansanyń jumys tıimdiligi men senimdiligin joǵarylatýǵa múmkindik beredi.
T-50/60-8,8 jańa jylytý týrbınasyn ornatý jumystary 2015 jyly bastalǵan. Ony iske qosý stansanyń bekitilgen elektr qýatyn 252 MVt, bekitilgen jylytý qýatyn 564 Gkal/saǵ deıin ulǵaıtýǵa múmkindik beredi.
Osyǵan deıin JEO-da tek negizgi jáne qosymsha qurylǵylardy aýystyrý jáne qalpyna keltirý boıynsha jumystar júrgizilgen. Stansany keńeıtý, №8 jańa týrboagregatty qurý kásiporynnyń qalpyna keltirý jáne tehnıkalyq qaıta jabdyqtaý ınvestısııalyq baǵdarlamasyn júzege asyrýdyń arqasynda múmkin boldy.
Ol stansanyń senimdiligi men jumys tıimdiligin joǵarylatyp qana qoımaı, sonymen qatar týrboqurylǵylardyń jalpy tozýyn tómendetýge múmkindik beredi, sondaı-aq Jezqazǵan óńirin turaqty elektr qýatymen qamtıtyn bolady.
Jańa týrboagregatty iske qosý sharasyna Qaraǵandy oblysy ákiminiń orynbasary Anatolıı Shkarýpa men Jezqazǵan qalasynyń ákimi Qaırat Begimov qatysty.
Qaırat ÁBILDA, «Egemen Qazaqstan»
Qaraǵandy oblysy,
Jezqazǵan qalasy