Mańǵystaý oblysynyń ákimi Eraly Toǵjanov Prezıdent Nursultan Nazarbaevtyń atynan alǵys hat aldy. Memleket basshysy Mańǵystaý oblysynyń jurtshylyǵyn Astananyń 20 jyldyǵymen quttyqtap, ystyq yqylasyn jetkizdi. Bul týraly Mańǵystaý oblysy ákimdiginiń baspasóz qyzmeti habarlady.
Elbasynyń mańǵystaýlyqtarǵa joldaǵan alǵys hatynda «Táýelsiz Qazaqstannyń sımvoly sanalatyn bas qalamyzdyń aıtýly mereıtoıy - barsha qazaqstandyqtarǵa ortaq qýanysh.
Saryarqa tósine qazyǵyn qaqqan eńseli elordamyzdy turǵyzýǵa búkil halqymyz jumyla atsalysty.
Bıyl bas qalanyń týǵan kúnine oraı «О́ńirlerdiń Astanaǵa tartýy» jobasy aıasynda Mańǵystaý oblysy da óz úlesin qosty. Ultaralyq kelisimdi tý etken Qazaqstan úshin dostyq pen beıbitshilik basty baılyq sanalady. Osyǵan oraı, Mańǵystaý óńiri syılaǵan Dostyq úıi tatýlyǵy men yntymaǵy jarasqan kóp ultty halqymyzdyń bereke-birligin bekemdeı túsedi dep senemin. Astanany kórkeıtýge zor úles qosqan Sizge jáne óńir turǵyndaryna shynaıy rızashylyǵymdy bildiremin.
Sizderge zor densaýlyq, baq-bereke tileımin!» delingen.
Dostyq pen beıbitshiliktiń sımvolyna aınalǵan bul ǵımarat Astana qalasyndaǵy Almaty aýdany, Baýyrjan Momyshuly kóshesi, 24 úıde ornalasqan. Jobanyń iske asyrýshysy - «Dostyq-Qazaqstan» qoǵamdyq qory.
Jańa Dostyq úıi úsh qabattan turady. Ǵımarattyń birinshi qabatynda kórme zaly, akt zaly, «Qoǵamdyq kelisim» KMM-niń jáne Qazaqstan halqy Assambleıasynyń qoǵamdyq qurylymdarynyń bólmeleri bar. Ekinshi qabatynda konferens-zal, murajaı, etnomádenı birlestikterdiń bólmeleri kózdiń jaýyn alyp tur. Horeografııalyq zal, vokal stýdııasy, ashana, qyzmetkerler bólmesi sokoldy qabatta ornalasqan. Qonaqtar jáne qyzmetkerler úshin arnaıy yńǵaıly avtoturaq jasalǵan. Atalmysh ǵımarattyń jan-jaǵy abattandyrylyp, kógaldandyrylǵan.
Qazaqstan halqy Assambleıasynyń múshesi Salman Geroev Bas qalamyzdaǵy etnomádenı birlestikterdiń atynan Astana qalasynyń 20 jyldyǵyna oraı jasaǵan keremet syılyq úshin Elbasy N.Á.Nazarbaevqa óz alǵysyn jetkizdi.
Mańǵystaý oblysynyń bas qalamyzǵa tartýy – Astananyń ajaryn kórkeıte túseri anyq.
Eńsesi bıik Elordamyz Mańǵystaý óńiri syıǵa tartqan Dostyq úıi ǵımaratymen birge jańaryp, jasara bereri haq.