Fransııa ulttyq quramasy Belgııany jeńip, fınalǵa joldama aldy. Tartysty ótken matchta Samýel Iýmtıtıdiń soqqan jalǵyz goly sheshýshi boldy. Al Belgııa sol kúıi fınaldan armanda ketti. «Qyzyl soıqandar» eshqashan fınalǵa shyǵyp kórmegen edi.
«Tulpary ozǵan eldiń taıy da ozar» demeı me, sol sekildi Belgııanyń da bul jolǵy quramy jaqsy boldy. Kileń «sen tur, men ataıyn» degen jigitter edi. Shıfo, Gerrerts, Vılmotstardyń sońyn ala shyqqan bir býyn talantty oıynshylar desek artyq emes. Barlyǵy alpaýyt tórt chempıonattyń kórkin keltirip júrgen sheberler. Biraq, tájirıbe me, sáttilik pe, áıteýir Belgııaǵa birdeńe jetispedi. Mamandar ártúrli ýáj aıtyp aqtalǵanymen, onyń jaýabyn eshkim bere almas.
Belgııa birinshilikti keremet bastady. Panamany 3:0, Týnısti 5:2, Anglııany 1:0 utty. Toptyq kezeńde úsh oıynnan 9 upaı aldy. Mundaı komandalar chempıonatta ózi úsheý-aq. Toptyq kezeńdi tamasha ótkergen Belgııa pleı-offty qıyn bastady. Mýndıaldiń sensasııasy tirkelip, Japonııa kelesi kezeńge ótip keter edi. Oıynnyń 70 mınýtynda «qyzyl soıqandar» 0:2 esebimen jeńilip jatty. Biraq, bapker Roberto Martınes der kezinde alańǵa tyń oıynshylardy kirgizip, oıynnyń mán-maǵynasyna ózgeris engizdi. Qalǵan 20 mınýt ishinde Belgııa esepti teńestirip qana qoımaı, tipti jeńisti julyp áketti. Osy kóńilmen olar kelesi oıynǵa da senimdi shyqty. Bul joly isti nasyrǵa shaptyrmaı-aq Brazılııa qaqpasyna 2 dop soǵyp, kerisinshe ózderi qorǵanysqa myqtap kiristi. Brazılııanyń tek bir golǵa ǵana shamasy jetti. Azııa men Latyn Amerıkasynyń komandalaryn jarystan ushyrǵan soń, Belgııanyń aldynan alpaýyt Fransııa shyǵa keldi. Kórshiles jatqan qos eldiń quramasyndaǵy fýtbolshylar bir-birin burynnan tanıdy. Tipti keıbireýleri balalar fýtbolynan bastap bir-birine júzi tanys. Fransııa men Belgııa sapyndaǵy 20 fýtbolshy osy kúnniń ózinde ártúrli komandalarda birge oınaıdy. Mysaly, Fransııa shabýylshysy Olıve Jırý men Ngolo Kante «Chelsı» oıynshylary. Aǵylshynnyń osy komandasynda Belgııanyń qaqpashysy Tıbo Kýrtýa men Eden Azar óner kórsetetinin umytpaıyq. Sonda jalpylama alǵanda «Manchester Iýnaıted», «Manchester Sıtı», «Barselona», «Monako» sekildi komandalarda eki quramanyń 20 fýtbolshysy aralas-quralas oınaıdy eken.
Belgııa jartylaı fınalda jeńilgenimen, jarystyń úshinshi ornyn ıemdenýi múmkin. Qola júlde úshin ótetin jubanysh matchyna qatysady. Jalyndap turǵan jas komandaǵa onyń ózi de zor tabys bolary anyq. Degenmen, álemdik dodada tamasha óner kórsetken Belgııa 2020 jyly ótetin «Ulttar lıgasynda» keremet nátıjege qol jetkizýi ǵajap emes.
Al fınalǵa shyqqan Fransııa araǵa 20 jyl salyp chempıon atansaq deıdi. Degenmen, 2006 jyly da fransýzdar fınalda óner kórsetkenin eshkim umyta qoıǵan joq. Zınedın Zıdannyń alańnan qýylyp, Materasıdiń keýdesinen uratyn kezi jaıly kitaptar jazylyp, eskertkishter ornatylyp ta qoıdy ǵoı. Ol fınaldy Fransııa jankúıerleri asa qatty eske alǵysy joq. 1998 jyly Fransııa quramasy chempıon bolǵan soń, araǵa 3 aı salyp, ómirge Kılıan Mbappe kelipti. Fransııany alǵa jetelep, mańyzdy goldardy soǵyp júrgen 19 jastaǵy talant endi fınalda gol soǵyp, tarıhta qalsam deıdi. Keıbir jýrnalshylar 1998 jyl Fransııa fýtboly úshin aıtýly jyl deıdi. Sebebi «Fransııa Álem chempıony atandy, ári Mbappe de sol jyly dúnıege keldi», deıdi. Kılıan týraly osylaı aıtýǵa ázirge erte deseńizder jas periniń qoldy-aıaqqa turmaı eki-úsh oıynshyny aldap ótetin kezderin kórgende oılanyp ta qalarsyz. Álem fýtbolyna taǵy bir ańyz oıynshy keldi me, joq áli olaı aıtýǵa erte me, ony biz 15 shildede bolatyn fınalda baıqarmyz. Al Fransııa quramasy fınaldyń favorıti ekeni daýsyz. Dıde Desham fýtbolshy kezinde kótergen kýbogyn, endi bapker bolyp kótere ala ma?
Ol endi eki kúnnen keıin belgili bolady
Ermuhamed MÁÝLEN,
«Egemen Qazaqstan»