Májilis depýtattary Abzal Eralıev, Baqytbek Smaǵul, Genadıı Shıpovskıhtiń Syr óńirine sapary Jańaqorǵan aýdanynan bastaldy. Olar aýdandaǵy SKZ-U kúkirt qyshqyly zaýytynyń jumysymen tanysyp, jumysshy ujymmen kezdesti.
«SKZ-U» zaýyty – kúkirt qyshqylyn daıyndaıtyn Syr boıyndaǵy aýqymdy óndiris oryndarynyń biri. Sheteldik ozyq ári tıimdi, qorshaǵan orta úshin qaýipsiz tehnologııalardy qoldanatyn zaýyt memlekettiń údemeli – ındýstrııaldy ınnovasııalyq damý baǵdarlamasy aıasynda 2007 jyly qurylysy bastalyp, 2011 jyly paıdalanýǵa berilgen. Munda táýligine 1500, jylyna 500 000 tonna kúkirt qyshqyly óndiriledi. Búginde zaýytta 277 adam jumys isteıdi. Onyń 65 paıyzy – jergilikti turǵyndar.
– Memleket basshysy Úkimetke energııa únemdeý salasynda ishki jalpy ónimdi únemdeýdi 2020 jylǵa qaraı 25 paıyzǵa tómendetý boıynsha mindet júktegen bolatyn. Bul baǵytta bizdiń kásiporynnyń qosyp otyrǵan úlesi qomaqty. Iаǵnı zaýyt qyshqyldy óndirý barysynda shyǵatyn býdan saǵatyna 18 mVt elektr energııasyn óndirip otyr, – dedi zaýyt basshysynyń orynbasary Sáýlebek Dúısenbekov.
Májilismender, sondaı-aq turǵyndardyń ótinishterin tyńdap, Parlamentte atqarylǵan jumystardy, sonymen birge Elbasy Joldaýy men «Prezıdenttiń bes áleýmettik bastamasynan» týyndaıtyn mindetterdiń júzege asyrylýyna keńinen toqtaldy.
***
Aımaqtarǵa sapar aıasynda bir top Májilis depýtaty Batys Qazaqstan oblysyna keldi. Evgenıı Kozlov, Gleb Shegelskıı, Sergeı Sımonov jáne Snejanna Imasheva mamandandyrylǵan halyqqa qyzmet kórsetý ortalyǵynyń jumysymen tanysty.
Bıyl 31 mamyrda ashylǵan bul HQO kúnine shamamen 500-600 turǵynǵa qyzmet kórsetip, aıyna 8 myńǵa jýyq ótinishti qabyldaıdy. Bul rette Májilis depýtaty Snejanna Imasheva ortalyqtyń jumysyna joǵary baǵasyn berdi. Onyń aıtýynsha, bul saparlar Parlamenttiń kezekti sessııasynyń qorytyndysy boıynsha Parlament jumysy jáne Memleket basshysynyń bastamalarynyń qalaı júzege asyrylyp jatqanyn túsindirý maqsatynda ótkizilýde. «Osy maqsatta biz oblystaǵy mamandandyrylǵan halyqqa qyzmet kórsetý ortalyǵyn araladyq. Ortalyqtyń jumysy kóńilimizden shyqty. Ásirese elektrondy qyzmet barlyq jerde kórsetilip standarttarǵa saı jumys isteýde», dedi ol.
Kezdesý barysynda depýtattar Parlamenttiń zań shyǵarýshylyq jumysymen jáne Memleket basshysynyń áleýmettik bastamalarynyń júzege asyrylý barysy týraly aıtyp berdi.
***
Májilis depýtattary Pavel Kazansev, Baqytjan Ertaev jáne Janat Omarbekova Astana qalasyndaǵy «Evrokopter Qazaqstan ınjınırıng» JShS-ne baryp, jumys barysymen tanysty.
Astanadaǵy eń iri kásiporyn sanalatyn «Evrokopter Qazaqstan ınjınırıng» tikushaq qurastyrýmen aınalysady. Kásiporynnyń jumys barysymen tanysqan depýtat P.Kazansev zaýyttyń ózge elderdiń naryǵyna jol tabýda ilgeri damyp kele jatqan kásiporyndardyń biri ekenin aıta kelip, kásiporyn qurastyratyn tikushaqtarǵa degen suranys kórshiles qyrǵyz elinen kóp túsetinine toqtaldy.
Sonymen qatar zaýyt sheńberinde Ortalyq Azııa men elimizdiń aımaqtaryna qajetti mamandardy daıarlaıtyn avıasııalyq bilim berý ortalyǵy jumys isteıdi. Bul álem boıynsha V1 tehnıkalyq dáris pen ES145 tikushaǵyn basqaratyn ushqyshtardy daıarlaıtyn jalǵyz ortalyq bolyp sanalady. Qazirgi tańda ortalyqta 8 adam bilim alýda.
Zaýyt ornalasqan aımaqta servıs ortalyǵy da bar. Bul jerde kásibı maman ıeleri jańa tikushaqtardyń ushýǵa daıyndyǵyn tekserip, jóndeý jumystaryn júrgizedi. О́z kezeginde «Evrokopter Qazaqstan ınjınırıng» JShS kommersııalyq dırektory Tımýr Tılının ortalyqta ushqyshtar daıarlaýmen ǵana aınalyspaıtynyn, munda mamandyqqa qajetti tehnıka qyzmetkerleri men avıonıkterdi oqytatynyn jetkizdi.
***
Parlament Senatynyń depýtattary Serik Jaqsybekov pen Edil Mamytbekov jumys babyndaǵy sapar aıasynda «Astana – jańa qala» erkin ekonomıkalyq aımaǵyndaǵy №1 ındýstrııalyq parktiń nysandaryn aralady.
Senatorlar sapar barysynda qaǵaz ónimderin óndiretin «Ipek Kagit Asia» kásipornynda, «Taý-Ken Altyn» affınaj zaýytynda, «GLB» úı qurylysy kombınaty mekemelerinde boldy. Kezdesý qorytyndysy boıynsha erkin ekonomıkalyq aımaqtyń odan ári damýyna kedergi keltiretin zań shyǵarý sıpatyndaǵy birqatar ózekti máseleler aıqyndaldy.
Parlamentshiler Senattyń budan keıingi jumystary barysynda múddeli taraptarmen birlese otyryp ózekti máselelerdi sheshý jáne ınvestorlardyń usynystaryn júzege asyrý jónindegi is-qımyldy jalǵastyrýǵa nıettenip otyr.
***
Qaraǵandy oblysyna saparlap kelgen Májilis depýtattary Gúlnar Bıjanova men Serik Sápıev óńir halqymen kezdesti.
Depýtattar Buqar jyraý aýdanyndaǵy Qýshoqy aýylyna baryp, «Botaqara Jylý» kásipornynyń eńbek ujymymen kezdesti. Munda 120-ǵa jýyq adam jumys isteıdi. Kásiporyn sýmen, jylýmen jabdyqtaý jáne sýdy burý jelileri jumysyn júzege asyrady. Ortalyq jylytý júıesine aýdan ortalyǵyndaǵy 316 úı, onyń ishinde 16 kópqabatty turǵyn úı, 5 bıýdjettik uıym men jekemenshik kásiporyndar da qosylǵan. Kezdesýdiń basty taqyryby Memleket basshysynyń bes áleýmettik bastamasy týraly boldy.
Kezdesýde budan ózge turǵyndar kókeıinde júrgen ózekti máseleler kóterildi. Turǵyndar Májilis depýtattaryna Qýshoqy aýylyna gaz qubyryn tartý, «7 – 20 – 25» baǵdarlamasy boıynsha turǵyn úı alýdyń tetikteri jáne basqa da mańyzdy suraqtaryn qoıdy. Sondaı-aq 60 jyldardyń basynda salynǵan jergilikti sý jelilerin qalpyna keltirý men jedel járdem bólimshesiniń jabylýy sııaqty problemalaryn nazarǵa alýdy surady. О́z kezeginde Májilis depýtattary bul máselelerdi derbes baqylaýlaryna aldy.
***
Májilis depýtaty Natalıa Jumadildaeva aımaqtarǵa jumys saparyn Shymkenttegi oblystyq Assambleıa janyndaǵy qurylymdardyń jetekshilerimen, etnomádenı birlestikterdiń tóraǵalarymen jáne óńir turǵyndarymen kezdesýden bastady.
Kezdesýde depýtat Elbasynyń Qazaqstan halqyna arnaǵan bıylǵy Joldaýynda aıtylǵan basymdyqtardyń iske asyrylý barysymen tanysyp, «Prezıdenttiń bes áleýmettik bastamasy» sheńberinde atqarylyp jatqan jumystardy talqylady.
Sondaı-aq N.Jumadildaeva Shymkent qalasyndaǵy S.Erýbaev atyndaǵy №24 mektep-lıseıiniń jáne qalalyq oqýshylar saraıynyń jumysymen tanysyp, ustazdarmen kezdesti. Ustazdarmen áńgime barysynda elimizdegi bilim berý salasyndaǵy reformalar men muǵalimderdi áleýmettik qorǵaý máselelerine nazar aýdaryldy.
Májilis depýtaty budan ári Túrkistan oblysyndaǵy Saıram, Tólebı, Ordabasy, Maqtaaral, Saryaǵash aýdandaryndaǵy birqatar áleýmettik jáne óndiristik nysandardy aralap, eńbek ujymdarymen, jergilikti turǵyndarmen kezdesýler men jeke qabyldaýlar ótkizbek.
Daıyndaǵan Venera TÚGELBAI,
«Egemen Qazaqstan»