Batys Qazaqstan oblysyna jumys saparymen kelgen Qazaqstan Respýblıkasy Parlamenti Májilisiniń depýtaty, áleýmettik-mádenı damý komıtetiniń múshesi Keńes Absatırov Oral qalasyndaǵy birqatar qurylys nysanyn aralap, keıbir óndiris oryndarynyń jumysymen tanysty.
- Osy kúnderi Májilis depýtattary belgilengen kestege saı aýyl-aımaqty aralap, halyqtyń turmys-tirshiligimen tanysyp júr. Biz ótken aptada Jambyl oblysynda bolsaq, endi mine, batys óńirge keldik. Basty maqsatymyz – Elbasynyń bes áleýmettik bastama tapsyrmasynyń jergilikti jerde oryndalýyn qadaǵalaý, - deıdi depýtat saparynyń mán-jaıyn túsindirip.
Májilis depýtaty Oral qalasynda memleket pen jekemenshiktiń áriptestigi negizinde qolǵa alynǵan qurylys nysanymen tanysty. Dál osy baǵdarlama sheńberinde Oral qalasynyń ortalyǵyndaǵy kóne úılerdiń ornyna kópqabatty jańa turǵynúı salý jumystary sońǵy eki jyldan beri qarqyndy júrip jatyr. Qurmanǵazy kóshesi, 196 mekenjaıynda ornalasqan, 1937 jyly paıdalanýǵa berilgen qos qabatty apatty úıdiń ornyna búginde 9 qabatty záýlim úı salynyp jatyr. Eski úıde turatyn 8 otbasy ýaqytsha basqa páterge kóshirilgen. Qurylys bitken soń olar burynǵy páterine saı baspanany jańa úıden tegin alady.
«Qazhol» JShS qolǵa alǵan qurylys nysany bıyl kúzde paıdalanýǵa berilmek. Oral qalasy ákiminiń orynbasary Altynbek Qaısaǵalıevtiń aıtýynsha, 64 páterlik jańa turǵyn úıdiń qalǵan bóligi «Turǵyn úı qurylys jınaq bankiniń» salymshylaryna beriledi eken. Úıdiń tómengi qabatynda saýda nysandaryna da oryn qarastyrylǵan. Osy aýdannan taǵy da 74 páterlik toǵyz qabatty úı men 200 páterlik 11 qabatty turǵyn úı salý josparda tur.
- Batys Qazaqstan oblysynda qurylys jaqsy qarqynmen júrip jatyr eken. Sońǵy jyldary qala ózgerip, jańaryp keledi. Záýlim úıler salynyp, joldar jóndelýde. Osynyń barlyǵy halyq ıgiligi úshin jasalýda, - deıdi Májilis depýtaty Keńes Absatırov.
Budan keıin Májilis depýtaty «Jaıyq et» JShS men «POSh Rýno» JShS-da bolyp, kásiporyndardyń jumysymen tanysty.
- Batys Qazaqstan oblysy – ejelden mal sharýashylyǵy damyǵan aımaq qoı. Bul óńirge osyndaı iri óńdeýshi kásiporyn kerek-aq edi. Árıne, Oralda buryn «Zemlıachka» sekildi teri óńdeýshi kásiporyndar boldy. Biraq myna «Posh Rýno» JShS-nyń orny bólek. Munda qazirgi eń zamanaýı jabdyqtar ornatylǵan, mal terisin qabyldap, tereń óńdeýdiń satylary ıgerilip jatyr. Oralǵa kelsem, arnaıy kóremin dep josparlaǵan kásiporynnyń biri osy edi, - deıdi Keńes Ǵarapuly 2017 jyly ashylǵan teri óńdeýshi kásiporynnyń tabaldyryǵyn attap turyp.
Kásiporynda teri óńdeýshi ıspan jabdyqtary ornatylǵan. Eki gektar jerge ornalasqan kásiporynnyń qýaty jylyna 182 myń sıyr terisi, 600 myńnan asa qoı-eshki terisin óńdeýge jetedi. Bul jerde teri shala óńdelip, jartylaı shıkizat kúıinde negizinen Túrkııaǵa jóneltilip jatyr eken. Bolashaqta terini daıyn ónim – tekstıldi bylǵary dárejesine deıin óńdeý josparlanǵan.
Depýtatpen kezdesýde «Posh Rýno» JShS Bas dırektorynyń mindetin atqarýshy Aleksandr Dmıtrıenko jumys barysynda kezdesetin keıbir túıitkilderdi de aıtyp ótti.
- Biz jumysqa kiriskeli aýyl sharýashylyǵynyń túrli salasyndaǵy kemshilik-olqylyqtyń izi kórinip jatyr. Solardyń biri – Batys Qazaqstan óńirindegi veterınarııalyq sharalardyń jetkiliksizdigi. Máselen, sıyr terisinde shodyra sekildi parazıt kóp. Bul teriniń sapasyn tómendetedi. Al osy parazıtterge qarsy vaksınasııa sharalary ýaqtyly júrgizilse, qatań qadaǵalansa, mundaı kemshilik bolmas pa edi? – deıdi teri óńdeýshi kásipker.
Bolashaqta óńirdegi negizgi teri óńdeýshi kásiporynǵa aınalyp, bylǵary buıymdaryn, aıaq kıimderin shyǵarýdy josparlap otyrǵan «poshrýnolyqtar» Batys Qazaqstanda mal basynyń kóbeıip, sapasy artýyna da osylaısha múddeli bolyp otyr.
- Parlamenttegi «Azat» partııasy – áý bastan kásipkerlerdiń partııasy, eńbek adamynyń múddesin qorǵaýshy qoǵamdyq uıym retinde belgili. Sondyqtan Oralda aıtylǵan usynys-pikirdiń barlyǵyn da aldaǵy qyzmetimizde eskeretin bolamyz. Taǵy bir másele, qazaqstandyq shıkizat óte arzan baǵamen shetelge ketip jatyr, buǵan da zań turǵysynda tosqaýyl salýymyz kerek. Árıne, Qazaqstanda «Bıznestiń jol kartasy – 2020» t.b. baǵdarlamalar arqyly kásipkerlikti damytýǵa memleket tarapynan kóp qoldaý jasalyp jatyr, biraq alda turǵan jumys ta kóp. О́ńdeýshi kásiporyndardyń salyq júktemesin azaıtý, salyq nesıesi júıesin engizý – memleketke de, kásipkerlikke de paıdaly bolar edi, - dedi qoshtasarda Májilis depýtaty jýrnalıstermen kezdesýinde.
Qazbek QUTTYMURATULY, «Egemen Qazaqstan»
Oral qalasy