Fransııa tasjoldarynda ótip jatqan «Týr de Frans» jarysynyń 15-kezeńinde veloshabandozdar Mııo – Karkason marshrýt boıynsha 181,5 shaqyrym joldy júrip ótti.
Bul kezeńde de «Astananyń» veloshabandozy Magnýs Kort máre syzyǵyn birinshi bolyp kesip, elorda komandasynyń sportshylary qatarynan ekinshi kún aıtýly dodanyń kezeń jeńimpazy atanyp otyr. Ekinshi oryndy «Bahrain-Merida» komandasynyń ókili Ion Isagırre, úshinshi oryndy «Trek-Segafredo» komandasynyń veloshabandozy Baýke Mollema ıelendi.
Eske salaıyq, Sen-Pol-Trýa-Shato – Mand aralyǵynda ótken 14-kezeńde «Astana» velokomandasynyń taǵy bir ókili ıspanııalyq Omar Fraıle jeńiske jetken bolatyn. Bir aıta keterligi, sol kúni «Astana» veloshabandozdary kópkúndiktiń atalmysh kezeńine qara lenta baılap, 19 shilde kúni Almaty qalasynda urylardyń qolynan qaza tapqan mánerlep syrǵanaýshy Denıs Tenniń rýhyna qurmet bildirgen edi.
«Týr de Frans» jarysynyń 15-kezeńinen keıin jalpy esepte «Sky» velokomandasynyń ókili Geraınt Tomas kósh bastap tur. Al «Astana» sapynan Iаkob Fýlsang 9-orynda keledi. Ol kóshbasshysy Tomastan 6 mınýt 14 sekýndqa arta qalyp qoıǵan.
Álı BITО́RE,
«Egemen Qazaqstan»