Byltyr 60 jastaǵy Qunanbaı Abyraevqa aldymen tolyǵymen jasandy júrek salyndy. Araǵa toǵyz aı salyp, donor tabyldy. Pasıenttiń ózi de donorlyq júrekke daıyn bolyp shyqty. Osylaısha, Ulttyq ǵylymı kardıoxırýrgııa ortalyǵynyń mamandary álem boıynsha alǵash ret bir adamǵa aldymen jasandy júrekti saldy, artynan ony donorlyq júrekpen aýystyrdy, dep xabarlaıdy QazAqparat tilshisi.
«Toǵyz aı buryn ol donorlyq júrekke daıyn bolmady. Sebebi baýyr, ókpe jáne taǵy basqa organdarynyń fýnksııasy nasharlap ketti. Al jasandy júrekti salǵannan keıin jaǵdaıy jaqsardy, ókpe arterııasyndaǵy qan qysymy da qalpyna keldi. Osyndaıda donorlyq júrekti salýǵa bolady. Sóıtip, úsh aıdan keıin pasıenttiń jaǵdaıy jaqsarǵannan keıin biz donorlyq júrekti izdeýge kiristik», - dedi ortalyq basshysy Iýrıı Pıa.
Onyń aıtýynsha, jasandy júrekti donorlyq júrekpen almastyrý operasııasy 12 saǵatqa sozyldy. Álem boıynsha alǵash ret jasalǵan otany shetelden 30 jýyq dáriger kórýge keldi. Qazirgi kezde Qunanbaı Abyraevtyń jaǵdaıy jaqsy. О́z kúshimen júrip, turady. Teledıdar kórip jatady. Al donorlyq júrekti bir jas jigittiń týǵan-týystary berýge kelisti. Ol qaıtys bolǵannan keıin onyń bir emes, birneshe aǵzasyn naýqas adamdarǵa taratyp berdi. «Biz ol jigittiń ata-anasyna myń alǵys aıtamyz. Olar júrekti ǵana emes, búırekti de, baýyrdy da berýge kelisti. Osylaısha, bir adam, kem degende, tórt adamnyń ómirin saqtap qaldy», - dep atap kórsetti ortalyq basshysynyń orynbasary Maxabbat Bekbosynova.
Aıta keteıik, ótken jyly qarasha aıynda Ulttyq ǵylymı kardıoxırýrgııa ortalyǵy 60 jastaǵy er adamǵa jasandy júrek ımplantansııasyn jasaǵan bolatyn. Jasandy júrek - «Carmat SA» atty fransýz kompanııasynyń ónimi. Onyń qazirgi baǵasy - 1 mln eýro. Memleket te, ortalyq ta oǵan aqsha jumsaǵan joq. Fransýz kompanııasy óz apparatyn synaqtan ótkizip jatyr. Sol sebepti bárin tegin berdi. Sol joly ortalyq basshylyǵy jasandy júrek ıesi - Qunanbaı Abyraevpen kezdesýge ruqsat berdi. Aǵamyz qýanyshyn jasyra almaı, kóz jasyna da erik berdi.
«Men qatty aýyrdym. Myna jaqqa kelgende júre almadym, arbaǵa otyrǵyzyp ákeldi. Qazir bári durys... О́zimdi jaqsy sezinemin. Iýrıı Pıa meniń ekinshi ákem sııaqty. Ortalyq basshylyǵyna myń alǵys... 60 jastan keıin ózimdi osylaı sezinemin dep oılaǵan joqpyn», - dedi Qunanbaı aǵa.
Osy kezde jasandy júrek shıqyldaı bastady. Dárigerler oǵan kóp qobaljýǵa bolmaıtynyn aıtyp, pasıentti palatasyna alyp ketti.