Ortalyq kommýnıkasııalar qyzmetinde ótken baspasóz máslıhatynda Bilim jáne ǵylym mınıstrliginiń Balalardyń quqyqtaryn qorǵaý komıtetiniń tóraǵasy Nurbek Orshýbekov «Mektepke jol» respýblıkalyq aksııasy týraly baıandady.
«Búgin jyl saıynǵy «Mektepke jol» respýblıkalyq aksııasynyń bastalýyn jarııalaımyz. «Mektepke jol» aksııasy az qamtylǵan jáne kóp balaly otbasylardyń oqýshylaryna kómek kórsetýge jáne áleýmettik sebepter boıynsha balalardyń mektepke barmaýynyń aldyn alýǵa baǵyttalǵan. Bul aksııa 1 tamyz – 30 qyrkúıek aralyǵynda osymen on birinshi jyl ótkizilip otyr. Aksııa ótkizilgen on jyl ishinde 2 mln 600 myńnan astam balaǵa jalpy somasy 17 mlrd 800 mıllıon teńgeden astam materıaldyq kómek kórsetildi. Aksııa sheńberinde balalar keńse kerek-jaraqtarymen, kıimmen qamtylady. Jyldan jylǵa demeýshilik kómek kólemi artyp otyr», dedi ol.
Komıtet basshysy, sonymen qatar bıyl aksııa aıasynda bilim berý organdary men uıymdary tamyz-qyrkúıek aılarynda birqatar is-sharalardy ótkizetinin málimdedi.
«Birinshiden, árbir eldi mekende, qala mańyndaǵy saıajaılarda, bólimderde, fermalarda «táýekel tobyndaǵy» (qadaǵalaýsyz jáne panasyz balalar, áleýmettik jaǵdaıy tómen otbasylardan shyqqan balalar jáne mıgranttar, qaıyrshy balalar, dalada jumys isteıtin balalar jáne t.b.) balalardy anyqtaý úshin reıd júrgiziledi. Ekinshiden, reıdterdiń qorytyndysy boıynsha «táýekel tobyndaǵy» otbasylardan shyqqan jáne áleýmettik kómekke muqtaj balalardyń personaldy tizimderi jasalyp, bilim berý organdaryna jáne demeýshilerge beriledi. Úshinshiden, aksııa kezeńinde bilim berý mekemeleri men uıymdarynda senim telefondary men qoǵamdyq qabyldaýlardyń úzilissiz jumysy uıymdastyrylady. Iri saýda ortalyqtarynda gýmanıtarlyq kómek pýnktteri ornatylady», dedi ol.
Muqtaj jandarǵa kómektesýdi, sondaı-aq demeýshilik kómek kórsetýdi qalaıtyn kez kelgen adamdar elimizdiń Bala quqyqtary jónindegi ýákilettiginiń «111» ulttyq baılanys ortalyǵyna nemese Balalardyń quqyqtaryn qorǵaý komıtetiniń 74-25-28 senim telefonyna habarlasýyna, qajetti aqparatty Komıtettiń www.bala-qqk.gov.kz veb-saıtynan alýǵa bolady.
«Búginde jergilikti bılik organdary kómekke muqtaj balalardyń tizimin daıyndady. Bul – shamamen 323 myń bala, biraq tizimder ata-analardan ótinishterdi qabyldaý arqyly tolyqtyrylady. Men barlyq qazaqstandyqtarǵa «Mektepke jol» aksııasy 30 qyrkúıekke deıin jalǵasatynyn jáne oǵan belsendi qatysýǵa múmkindik bar ekenin jetkizgim keledi. Jergilikti atqarýshy organdardyń nazaryn az qamtylǵan otbasylardan shyqqan balalardy mektepke qaýipsiz tasymaldaýdy jáne qaýipsiz tamaqtanýdy qamtamasyz etý boıynsha sharalardy qabyldaý qajettiligine aýdarǵym keledi», dedi Balalardyń quqyqtaryn qorǵaý komıtetiniń tóraǵasy.
Raýan QAIDAR,
«Egemen Qazaqstan»