Árdaıym aldaryńa bıik maqsat qoıyp, oǵan qol jetkizýge aıanbaı kúsh salý qajet - Meıram Myrzabolatov

Orasan tájirıbesi, bilimi men qabiletiniń arqasynda ol jeke kásibin ashyp, IT-tehnologııasy salasynda tabysty kásipker atanyp, sheteldi baǵyndyrar múmkindigi bar edi. Alaıda, ol ǵylymdy tańdap, ómirin oqytýshylyq qyzmetke arnady.  Tabandy eńbeginiń arqasynda doktorlyq dıssertasııa qorǵap, AQSh-tyń beldi memlekettik oqý ornynynyń professery ataǵyna ıe boldy. 

Saparǵa shyǵar aldynda jas ǵalym SDÝ qabyrǵasyna kelip, jeke jetistigimen bólisti. Meıramnyń aıtýynsha, matematıka ǵylymyna degen qushtarlyq onyń boıyna mektepte sabaq bergen anasynan daryǵan. 

- Bala kezimnen, matematıkalyq tapsyrmalardy, oıjumbaqtardy sheshýge qumartyp, aqtóbelik qazaq-túrik lıseıiniń qabyrǵasynda júrgende-aq respýblıkalyq jáne halyqaralyq olımpıadalardan júldeli oryndarǵa ıe bolatynmyn. SDÝ-dy tańdaýym kezdeısoq emes, óıtkeni oqý ornynyń shetelge jol ashatyn  basty ereksheligi  – aǵylshyn tilinde bilim berýi boldy. Jaratylystaný fakýltetiniń úshinshi kýrsynda júrip, men oqytýshynyń kómekshisi retinde alǵash ret sabaq bere bastadym, - deıdi Meıram.

Bakalavrıat pen magıstratýrany támamdaǵan soń, 2012 jyly Meıram Pensılvanııa shtatynyń ýnıversıtetine kompıýterlik ǵylymdar salasy boıynsha  doktarantýraǵa qabyldandy. Sodan beri alty jyl boıy Meıram ýnıversıtet qabyrǵasynda dáris berip,  doktorlyq dıssertasııasyn qoǵaǵan. Professer dárejesin ıelengen jas ǵalym, sanaýly kúnder aralyǵynda jańa ǵylymı dárejede óz jumysyna kirispek.

Ol SDÝ-daǵy tájirıbesi jaıly erekshe yqylaspen eske alady jáne mansabynyń alǵashqy qadamy osy bilim ordasynda bastaý alǵanyn aıtady. 

- Bakalavrıatty aıaqtaǵan soń, men SDÝ magıstratýrasyna matematıka ǵylymy salasyna tústim. Sol kezeńnen-aq, men ǵylymmen aınasyp, professor bolý úshin, maǵan doktorlyq dáreje qajet ekendigin naqty túsindim. Dál osy kezde bilimimdi shetelde jalǵastyramyn dep bel býdym, - deıdi Myrzabolatov.

Otanynan shalǵaıda, Pensılvanııa ýnıversıtetindegi áriptesteri arasynda jalǵyz qazaq balasy bola tura, Meıramdy eldegi ǵylymnyń damýy tolǵandyrdy. Ol otandastaryn saǵynyp, aǵaıyn-týys pen ulttyq taǵamdy,  týǵan jerdiń topyraǵyn  ańsasa da, qaıtsem bilimimdi shyńdap, elge oralyp, ǵylymdy damytamyn degen oı sanasyna tynym bermegen. Qazir de bul oı oǵan kúsh-qýat berip, bolashaqqa jol silteýde.

- Qazirgi tańda eldegi ǵylymnyń dárejesi ondaǵydaı emes ekendigi barshamyzǵa belgili.  Árıne ǵylym deńgeıin kóterip, batystan da joǵary dárejege jetkizý armany maǵan maza bermeıdi. Alaıda bul úshin bilimdar adamdar kerek. Múmkin meniń qarapaıym mysalym ózge de jas urpaq ókilderine túrtki bolyp, olar shetelden bilim alyp, otanymyzǵa kelip tájirıbesimen bóliser, - degen úmitte professor. 

Bul kúni jastar tez tabys taýyp, jetistikke jyldam qol jetkizýge qumar bolsa da, Meıram jaqyn arada ǵylymnyń quny artyp, bilimdi jas býyn ókilderi eldegi bilim salasyn kórkeıtedi degen zor senimde.   

Batystyq bilim men otandyq bilim aıyrmashylyqtaryna toqtala otyryp, Meıram bizdegi bilim júıesiniń kemshil tustary men jetistigin  ashyq aıtty.

  - Aıta ketetin jaıt, bizdiń memlekette bakalavrıat, ásirese IT baǵyty boıynsha batystyq dárejeden esh kem emes. Aldyńǵy qatarly tehnıkalyq oqý oryndary zamanaýı úrdiste bilim berýde ári stýdentter batystyq júıe boıynsha tolyq aqparatty alýda, dep naqty aıta alamyn. Biraq magıstratýra men ǵylymı-zertteý  baǵyttary elimizde kenje qalýda, - degen pikirde jas ǵalym.

Stýdenttik qaýymdastyqqa kelsek, Meıramnyń pikirinshe, bizdiń jastar batystyq qurbylastaryna qaraǵanda áldeqaıda qarapaıym. Sheteldik jastar bala kezinen ózderin kóshbasshy sanap, bar bilimin kórsetýden qymsynbaıdy, keıde boılarynda menmendik te basym, deıdi ol. 

 20-tamyzdan bastap, Meıram AQSh-qa qaıta oralyp kúndelikti jumysyna kirisedi.   Oqytýshylyq qyzmetpen qatar jas professor ǵylymı jumystaryn joǵary ımpakt-faktorly ǵylymı baspalarǵa shyǵarýdy josparlaýda. Myrzabolatovtyń birqatar ǵylymı jumystary dıssertasııalyq eńbegin qorǵaý barysynda baspa betterinde jaryq kórgen. Bul professorlyq qyzmettiń negizgi bóligi,  deıdi Meıram.

 - Amerıkandyqtardan ne úırenýge bolady? Bul kózdegen maqsatyńdy birneshe jyl buryn naqty josparlaý qasıeti.  Nelikten sheteldegi bilim sapaly? Onda professorlar grantqa tapsyrys beredi, jospar quryp, óz jobalaryna sáıkes grantqa ıe bolady. Osy oraıda grant oqý aqysy men shákirtaqysyn tolyqtaı qamtıdy. Osyndaı shart boıynsha meniń de jetekshim meni jumysqa alyp otyr. Nátıjesinde árqaısymyz moınymyzǵa júktelgen mindetti tereń sezinemiz, – dep bólisti Meıram. 

Týǵan bilim oshaǵynda Meıramdy áriptesteri men dostary qushaq jaıa qarsy alyp, aq jol tilep, men bıik belesterdi baǵyndyrýǵa batalaryn jaýdyrdy.  Sanaýly kúnderdiń aralyǵynda ol qaıta muhıt asyp, óz qyzmetine kirisip ketedi. Alaıda onyń elim dep soqqan, patrıottyq sezimge toly júregi kindik qany tamǵan jerinde qalady. Otanyma oralam degen oı ony kez-kelgen ataq-dáreje, mansaptan da joǵary qanattandyryp, jańa jetistikterge jeteleıdi. Mine, Pensılvanııa shtaty bilim ordasynyń eń jas professorynyń tabys kilti men qarapaıym oqıǵasy osyndaı.

- Otandyq jastarǵa aıtarym, árdaıym aldaryńa bıik maqsat qoıyp, oǵan qol jetkizýge aıanbaı kúsh salý qajet. Esh ýaqytta jalqaýlyqqa jol bermeı, aldyn ala bárin josparlap, qıyndyqqa moıymaý. Jarym jol júrip te jetistiktiń teń jartysyna qol jetkizýge bolady. Árdaıym shynshyl bolyp, eger ózińnen bilimi asqan adam kezdesse, oǵan jol berý qajet. Bálkim, meniń ómirlik ustanym men uranym osy bolar, - degen pikirin bildirdi Meıram Myrzabolatov.