Maqtaaral aýdanyna tuńǵysh ret QR-nyń Parlamenti senatynyń depýtaty Álı Bektaev is-saparmen keldi. Jańadan qurylyp jatqan aýdannyń ahýalymen tanysý úshin eń aldymen aýdan ákiminiń apparatynda bolyp, apparat ǵımaratyn aralap kórdi, dep habarlaıdy Maqtaaral aýdany ákiminiń baspasóz qyzmeti.
Halyq qalaýlysy Myrzakent kentindegi «Aq altyn» mádenıet úıinde aýdan turǵyndarymen arnaıy kezdesip, májilis ótkizdi. О́z sózinde Álı Ábdikárimuly enishin alyp jańadan aýdan bolǵan maqtaaraldyqtardy quttyqtap, Myrzashól óńirine degen Elbasy N.Á.Nazarbaevtyń yqylasy erekshe ekenin atap ótti.
«Elimiz Táýelsizdik alǵannan keıin qıyn-qystaý kezeńge tap bolyp, qarjynyń tapshylyǵynan kóptegen aýdandar biriktirilip, bir ákimshilik ortalyqtan basqaryldy. Sol jyldary Maqtaaral, Jetisaı, Asyqata aýdandarynyń ornyna irilengen Maqtaral aýdany qurylyp, ortalyǵy Jetisaı qalasy boldy. Búgingi tańda elimiz eńsesin tiktep, damyǵan 50 eldiń qataryna endi. Bıýdjetimiz tolyp, qarjy máselesi óz sheshimin tabýda. Minekı, aradan 21 jyl ótkennen keıin Elbasymyzdyń irilengen Maqtaral aýdanyn 2-ge bólý týraly Jarlyǵy shyǵyp, burynǵy Maqtaaral aýdany qaıtadan quryldy. Qanshama jyldar boıy jetim balanyń kúıin keshken Myrzakent kenti aýdan ortalyǵy boldy. Aýdannyń óz bıýdjeti bolyp, aldaǵy ýaqytta jańadan qurylǵan Maqtaaral adam tanymastaı ózgerip, qulpyryp, damıtynyna men senemin. Sondyqtan, enshilerińizdi alýlaryńyzben Sizderdi shyn júrekpen quttyqtaımyn!» - dedi Alı Bektaev.
Jıyndy júrgizip otyrǵan aýdan ákimi Baqyt Asanov jańadan qurylǵan aýdanǵa eń birinshi bolyp kelgeni úshin halyq qalaýlysyna alǵysyn aıtyp, aýdan turǵyndaryn kıeli Myrzashól óńiriniń qara shańyraǵy sanalǵan Maqtaaral aýdanyn damytýǵa birigip atsalysýǵa shaqyrdy.
«Aǵymdaǵy jyldyń 10-shy tamyzynan bastap zańǵa sáıkes aýdan ákimdiginiń qurylymdyq bólimderiniń basshylaryn taǵaıyndaý júzege asyrylady. Tıisti taǵaıyndaýlardan keıin keste boıynsha ákimshilik aýmaqtyq birlikterderdegi turǵyndarmen kezdesip, ózekti máselelerdi anyqtaıtyn bolamyz. Sondyqtan, men Sizderdi yntymaq-birlikti arttyrýǵa, aýdanymyzdy kórkeıtý, abattandyrý jáne damytý jolynda birigip jumys jasaýǵa shaqyramyn!» - dedi Baqyt Násirhanuly.
Senatordyń turǵyndarymen kezdesýi barysynda óńirde qordalanǵan kóptegen máseleler talqylandy. Álı Bektaev turǵyndar tarapynan kóterilgen máseleler men jasalǵan ótinishterdi barynsha sheshýge at salysatynyn, jańadan qurylǵan aýdanǵa qoldaý kórsetý úshin úkimetke depýtattyq saýal joldaıtynyn atap ótti.
Májilisten soń depýtat Atakent kentindegi Qazaq maqta sharýashylyǵy ǵylymı-zertteý ınstıtýtynda bolyp, aýdan ǵalymdarynyń tyń jańalyqtarymen tanysty. Instıtýt dırektory Ibadýlla Úmbetaev mekemeniń labaratorııalaryn aralatyp, ǵalymdardyń jumys barysyn kórsetti. Osy ýaqytqa deıin maqtanyń 12 sortyn, qaýynnyń 4 sortyn oılap tapqan ınstıtýttyń jumysyna Álı Bektaev dán rıza bolyp, ǵylymı qyzmetkerlerdiń eńbegine tabys tiledi.