AQSh AES salady
AQSh sońǵy 30 jyldan keıin atom elektr stansalaryn salýdy qaıtadan qolǵa almaq. О́tken ǵasyrdyń 80-shi jyldary ekologtardyń talabyn eskerip, elde AES salýdy toqtatqan edi. О́mir basqany kórsetti. AES-tiń de artyqshylyqtary bar eken. Jańa stansany salýǵa 8 mıllıard dollar bólip otyr. Al bul elde búginge deıin 65 AES jumys isteıdi.
Búkil álemde qazir 56 AES salynyp jatqan kórinedi. Olardyń birazyna otyndy biz beremiz. Al ózimizde AES joq.
Prezıdent kepildigi
Jaqynda saılanǵan Ýrýgvaı prezıdenti Hose Mýhıka 1 naýryzda qyzmetine kirisedi. Onyń jurttyń esinde qalǵan málimdemesiniń biri – ol shetel ınvestorlaryna qarjylaryn el ekonomıkasyna salýdy ótindi. Eshqandaı da memleketke alyp qoıý, aýyr salyq salý bolmaıdy dep ýáde berdi. Rasynda da, Latyn Amerıkasyndaǵy biraz elde jeke kapıtalǵa tıisý faktileri bar.
Berlýskonı qaýiptenedi
Italııa premer-mınıstri Sılvıo Berlýskonı óz partııasynan saılanǵan senatorlarǵa qonaqasy berip otyryp, bireýler qastandyq jasaıdy-aý dep qorqatynyn aıtypty. Buǵan deıin de talaı ret ózine qarsy qastandyq áreket bolǵanyn, biraq olardan aman qutylǵanyn, endi qarsylastarynyń jańa qastandyq uıymdastyrmaq oılary barlyǵyn málimdepti. Osyndaı kóńilsiz áńgime aıta otyryp, úkimet basshysy partııalastaryna birneshe án oryndap bergen kórinedi.
Oppozısııany quptaıdy
Oppozısııa kerek degendi kóp adam aıtady, oǵan eshkim tańdanbaıdy da, kóp mán de bermeıdi. Al bul jaıynda Túrkimenstan prezıdenti aıtqan kezinde, oǵan búkil álem aqparat quraldary eleń ete qaldy. Onyń da sebebi bar: eldiń burynǵy basshysy Saparmurad Nııazov oppozısııany tunshyqtyryp, únin óshirgen. Jańa basshy Ǵurbanǵuly Berdimuhammedov zamany kelgende de, oppozısııaǵa esik ashyla qoıǵan joq edi. Jaqynda Mınıstrler Kabınetiniń májilisinde ol oppozısııalyq saıası partııa qurylsa, bul el ómirindegi mańyzdy oqıǵa bolar edi dep málimdeme jasady. Oǵan kóp adam senerin de, senbesin de bilmeı júr.
Dalaı-lama Vashıngtonda
Prezıdent Barak Obamanyń tıbetterdiń rýhanı kósemi Dalaı-lamamen Aq úıde kezdesýi Qytaı elinde úlken narazylyq týdyrdy. QHR Syrtqy ister mınıstrligi bul oqıǵa amerıkalyqtar tarapynan halyqaralyq kelisimdi, dıplomatııalyq ádepti buzǵandyq dep aıyptady. Sirá, bul eki el arasyndaǵy kelisim sharttarda Qytaıdyń tutastyǵy, Tıbettiń Qytaıdyki ekendigi eskerilgen bolsa kerek. Bul jerde Obamanyń da jaǵdaıyn túsinýge bolar. Byltyr sol Dalaı-lamany qabyldamaǵany úshin ol óz otandastary, saıası partııalar tarapynan aıtarlyqtaı syn estigen. Bárine birdeı jaǵý qıyn.
Generaldar qýyldy
Reseı prezıdenti Dmıtrıı Medvedev Ishki ister mınıstrligindegi 18 laýazymdy qyzmet basshylaryn jumystan qýypty. Áıteýir basshylardy jazalasa, halyqtyń qup kóretini bar. Jumysty aqsatqandardy, tipti jemqorlyqqa qatysy barlardy qýǵan jón-aý. Biraq qaı nárseniń de naýqanǵa aınalǵanyn quptaý da qıyn. Mundaıda qosaq arasynda jazyqsyzdar da ketip qalýy yqtımal. Áıtpese, bárin bir qamshymen bir kúnde sabamaı-aq, kemshilikteri ashylǵan kezde, toptap jazalaýdy kútpeı-aq, sharalar qoldansa bolmaı ma?
Maoıster kekshil
Úndistannyń Batys Bengalııa shtatynda ekstremısterdiń shabýylynan qaýipsizdik kúshteriniń 24 qyzmetkeri qaza tapty. Polısııa ýchaskesine kenet shabýyl jasap, beıqam adamdardy qyryp salǵan jasaqshylardyń basshysy muny buǵan deıin qaýipsizdik qyzmetkerleriniń maoısterge qarsy júrgizgen operasııasyna jaýap dep túsindirgen. Shabýylǵa 100 ekstremıst qatysyp, biraz qarý-jaraqty da oljalap ketipti.
Ázirlegen Mamadııar JAQYP.