Almaty qalasy 2029 jyly ótetin qysqy Azııa oıyndarynyń resmı uıymdastyrýshysy bolyp bekitildi, dep habarlaıdy Egemen.kz Ulttyq Olımpıada komıtetiniń baspasóz qyzmetine silteme jasap.
Tıisti qujatqa Italııanyń Mılan qalasynda Qazaqstan Ulttyq Olımpıadalyq komıtetiniń prezıdenti Gennadıı Golovkın men Azııa Olımpıadalyq keńesiniń basshysy, mártebeli Sheıh Djoan bın Hamad Ál-Tanı qol qoıdy.
Resmı rásimge, sondaı-aq, Azııa Olımpıadalyq keńesiniń basshylyǵy, Azııa elderi Ulttyq Olımpıadalyq komıtetteriniń ókilderi, halyqaralyq sport uıymdarynyń músheleri, sonymen qatar, Mılan-Kortına 2026 qysqy Olımpıada oıyndaryna oraı uıymdastyrylǵan is-sharalar aıasynda Mılanda bolǵan qurmetti qonaqtar men resmı tulǵalar qatysty.
Almatyda sporttyq jáne qalalyq ınfraqurylym tolyq qalyptasqan. Osy faktor qalaǵa aýqymdy qosymsha qurylys júrgizbeı-aq, keshendi halyqaralyq jarystardy ótkizýge múmkindik beredi. Qoldanystaǵy sport nysandaryn tıimdi paıdalaný jáne iri sporttyq is-sharalardy uıymdastyrýdaǵy mol tájirıbe Oıyndardy joǵary deńgeıde ári utymdy ótkizýge negiz bolmaq.
Azııa oıyndarynyń Qazaqstanda ótýi el úshin mańyzdy oqıǵa sanalady jáne olımpıadalyq sport túrleriniń damýyna qosymsha serpin beredi.
«Azııa oıyndaryn qosa alǵanda, iri halyqaralyq jarystardy uıymdastyrý el úshin strategııalyq mańyzy bar. Bul halyqaralyq sport qaýymdastyǵynyń Qazaqstanǵa degen joǵary senimin bildiredi. Sondaı-aq elimizdiń osyndaı deńgeıdegi týrnırlerdi qabyldaýǵa tolyq daıyn ekenin kórsetedi.
2029 jylǵy qysqy Azııa oıyndarynyń Almatyda ótýi qysqy olımpıadalyq sport túrleriniń damýyna jańa serpin beredi. Bul – biz úshin jınaqtalǵan tájirıbege jáne qosymsha nysandar salýdy qajet etpeıtin, qazirdiń ózinde jumys istep turǵan sporttyq ári qalalyq ınfraqurylymǵa súıene otyryp, elimizdiń uıymdastyrýshylyq múmkindigin is júzinde dáleldeýge jol ashady. Qazaqstan úshin qysqy Azııa oıyndaryn qaıta qabyldaý – úlken mártebe», dedi Gennadıı Golovkın.
Aıta keteıik, Qazaqstan buǵan deıin de iri mýltısporttyq jarystardy sátti ótkizgen. 2011 jyly elde qysqy Azııa oıyndary uıymdastyrylsa, 2017 jyly Almaty qalasynda Dúnıejúzilik qysqy Ýnıversıada ótti.
Prezıdent qysqy Olımpıadaǵa qatysatyn ulttyq qurama múshelerine Memlekettik týdy tapsyrdy
Buǵan deıin 2029 jylǵy Azııa oıyndaryn ótkizý quqyǵy Saýd Arabııasyna berilgen edi. Alaıda qabyldaýshy tarap ınfraqurylymdyq jobalardyń aýqymdylyǵyna jáne jarystardy daıyndaýǵa qoıylatyn qosymsha talaptarǵa baılanysty Oıyndardyń merzimin keıinge shegerý qajettigin málimdegen.
Aıta keteıik, bıylǵy jyldyń basty sporttyq dodasy – Qysqy Olımpıada oıyndary – 6-22 aqpan aralyǵynda Mılan jáne Kortına-d’Ampesso qalalarynda ótedi. Qysqy Olımpıada oıyndaryn Qazaqstan jáne Qazsport telearnalary tikeleı efırde kórsetedi.
Qysqy Olımpıada oıyndarynda el namysyn 36 sportshy qorǵaıdy