Zeınetaqymen qamsyzdandyrý týraly zańǵa engizilgen ózgerister men tolyqtyrýlar sońǵy ýaqytta qoǵamda qyzý talqyǵa túskeni belgili. Biraz túsinbeýshilikter de oryn aldy. Osyǵan oraı el turǵyndary kólik nemese páter tárizdi jeke múlikti satýdan túsken kiristiń 10 prosentin Biryńǵaı jınaqtaýshy zeınetaqy qoryna aýdarýǵa mindetti degen áńgimeniń ras, ótirigin bilmeı áýrege tústi. Soǵan oraı biz máseleniń anyq-qanyǵyn bilý úshin elimizge belgili zańger Seıfýlla ShYŃǴYSQA jolyǵyp, bul áńgimeniń qalaı, qaıdan shyqqanyn aıtyp berýin suradyq.
− Rasynda, bul másele biraz adamdy alańdatty. Ol alańdaýshylyq «Qazaqstan Respýblıkasynda zeınetaqymen qamsyzdandyrý týraly» zańynyń 25-baby 4-bóligine aǵymdaǵy jyldyń shilde aıynda ózgerister engizilgennen keıin paıda boldy. Biraq mundaǵy negizgi maqsat, azamattyq-quqyqtyq shart boıynsha qyzmet kórsetip nápaqa taýyp júrgen adamdarǵa olardyń aı saıynǵy kiristerinen Biryńǵaı jınaqtaýshy zeınetaqy qoryna 10% zeınetaqy jarnasyn tóletý edi. Áıtse de negizinde halyqtyń mazasyn qashyrǵan bul aqparat emes edi. О́zgertilgen redaksııadaǵy 25-bapty oqyǵandar dúnıe-múlikterin, máselen páter, avtokólikti satýdan tapqan kiristen 10% zeınetaqy jarnasyn tóleýimiz kerek pe dep alańdady.
Máselen, atalmysh zańnyń 25-baptyń jańa redaksııasynda:
«...azamattyq-quqyqtyq sıpattaǵy sharttar boıynsha kirister alatyn jeke tulǵalar úshin biryńǵaı jınaqtaýshy zeınetaqy qoryna tóleýge jatatyn, árbir aı úshin esepteletin óz paıdasyna mindetti zeınetaqy jarnalary alatyn kirisiniń 10 paıyzy mólsherinde...» dep kórsetilgen.
Baıqasańyz, bul sóılemde «azamattyq-quqyqtyq sıpattaǵy sharttar boıynsha» kiris alatyn jeke tulǵalar dep kelip, «jumystar men qyzmetter» degen eki sóz kórsetilmeı qalǵan. Sol sebepti, bul ózgeristi tikeleı túsiner bolsaq, azamattar barlyq azamattyq-quqyqtyq sıpattaǵy sharttar boıynsha kiristeriniń 10% zeınetaqy jarnasy retinde tóleýleri tıis bolyp kórindi. Máselen, páterińizdi nemese avtokóligińizdi satqyńyz kelse, satyp alýshymen azamattyq-quqyqtyq sıpattaǵy shart boıynsha júzege asyrýǵa múmkinshiligińiz bar. Degenmen Eńbek jáne halyqty áleýmettik qorǵaý vıse-mınıstri Svetlana Jaqypova dúnıe-múlikti satýdan túsken kiristen zeınetaqy jarnasyn tóleýdiń qajeti joq ekendigin aıtty. «Jeke tulǵalardyń kirisi azamattyq-quqyqtyq shartqa saı jumystardy oryndaý nemese qyzmet kórsetý nátıjesinde alǵan tabysy boıynsha anyqtalady. Jeke múlikti, depozıtterdi, aksııalardy nemese baǵaly qaǵazdardy satýdan túsken kirister zeınetaqy jarnalary boıynsha mindetti bolyp sanalmaıdy», dedi vıse-mınıstr.
Daıyndaǵan Aleksandr TASBOLAT,
«Egemen Qazaqstan»