Qazaqstan musylmandary dinı basqarmasynyń tóraǵasy Serikbaı qajy Oraz turǵyndardy Qurban aıt meıramymen quttyqtady.
"Qadirmendi qaýym! Barshańyzdy ısi musylman qaýymynyń ulyq meıramy - qurban aıtpen shyn júrekten quttyqtaımyn. Aıt meıramy qutty-berekeli bolǵaı! Ár otbasyna amandyq, myqty saýlyq, mol yrys pen baq-bereke tileımin!
Qurban aıt - kúlli musylman úmbetiniń eki ulyq merekesiniń biri. Bizdiń halqymyz bul meıramdy san ǵasyrdan beri erekshe qadirlep, aıryqsha atap ótken. Aıtýly meıramda aǵaıyn-jurt bir-birine "qurban aıt qutty bolsyn, aıt qabyl bolsyn" aıtyp, jyly lebizderi men izgi tilekterin arnaǵan.
Kórshi men týysqanǵa aıttap barý, qadirli qonaqqa aıttyq berip, úlkenniń alǵysy men batasyn alý - sonaý zamannan jalǵasyp kele jatqan musylmandyq dástúrimiz.
Allaǵa shúkir, saltynan jańylmaǵan jurtymyz táýelsizdik jyldarynda aıtty toılaý dástúrin qaıta jańǵyrtyp, ony halyqtyq deńgeıde atap ótýge múmkindik aldy. Elbasynyń ıgi bastamasymen elimizde qurban aıttyń qurmetine demalys jarııalanyp, bul meıram barsha ult pen ulysty birlik pen izgilikke úndeıtin halyqtyq merekege aınaldy.
Ásilinde "Qurban" sózi "jaqyn bolý", "jaqyndaý" degen uǵymdardy bildiredi. Musylman balasy aıt kúni qurbandyq shalý arqyly Allaǵa degen aq nıetin pash etedi. О́ıtkeni, qasıetti Quranda Haq Taǵala: "Umytpańdar, olardyń eti de, qany da eshqashan Allaǵa jetpeıdi. Oǵan jetetin nárse - júrekterińizge uıalaǵan taqýalyqtaryń (shynaıy nıetteriń):" ("Haj" súresi, 37-aıat), - dep adal nıettiń mańyzdylyǵyn atap ótken.
Jaǵdaıy bar, əri jolaýshy emes musylmanǵa qurbandyq shalý - ýəjip, musylmandyq mindet. Al múmkindigi joq adamǵa Alla Taǵala mundaı mindet júktemegen. Bul qasıetti kúnde múmkindigi joq, turmysy tómen otbasylarǵa qol ushyn berip, olarǵa qýanysh syılaý - saýapty is. Qurbandyqqa túıe, sıyr jəne qoı, eshki shalynady. Bir qoshqar nemese qoı bir kisi atynan shalynady. Al qara mal nemese túıeni jeti kisi birigip, qurbandyqqa shalýǵa bolady. Qurbandyq malyn aıt namazynan keıin aıttyń úshinshi kúni kesh batqanǵa deıin shalýǵa bolady. Qurbandyq eti aǵaıyn-týysqa, kórshige, turmysy tómen otbasylaryna taratylady.
Aıt kúni erte turyp, ǵusyl quıynyp, aıt namazyna qatysý - musylmandyq mindet. Aıt namazyna ádemi, taza kıimmen barǵan abzal.
Qurmetti otandastar! Qurban aıt – keshirim men meıirimniń, qanaǵat pen qaıyrymdylyqtyń merekesi. Aıttyń qurmetine izgilik pen keńshiliktiń jolyn ustanyp, qaraýsyz qalǵan qarttarǵa qaıyrymdylyq jasap, qamkóńil jandarǵa syılyq berýdiń saýaby mol. Osy rette barsha otandastarymdy el ıgiligi úshin jasalatyn qaıyrymdylyq aksııalary men saýapty is-sharalarǵa atsalysýǵa shaqyramyn.
Alla Taǵala shalǵan qurbandyqtaryńyz ben ıgi amaldaryńyzdy qabyl etkeı. Qasıetti Mekke qalasynda halqymyzdyń birligi men berekesin surap, duǵa jasap jatqan otandastarymyzdyń tilegi men qajylyǵy qabyl bolǵaı! Ámın! Qurban aıt qutty bolsyn!" , delingen Bas múftıdiń quttyqtaýynda.