Májilis depýtattary óńirlerge is-sapary barysynda óndiris oryndary men áleýmettik – mádenı nysandardy aralap, halyqpen jáne eńbek ujymdarymen kezdesip, onda Elbasy Nursultan Nazarbaevtyń Joldaýynda aıtylǵan mańyzdy baǵyttardy, bes áleýmettik bastamany zańnamalyq turǵydan qamtamasyz etý, sondaı-aq, úshinshi parlamenttik sessııanyń jumys qorytyndysy keńinen talqylanýda.
Osy rette, búgin Májilis depýtattary Sapar Ahmetov pen Bekbolat Tleýhan Astanada «iKomek» monıtorıng jáne jedel áreket etý ortalyǵynda bolyp, qazirgi tynys-tirshiligmen tanysty.
Kezdesý barysynda depýtat Sapar Ahmetov Elbasy bastamalarynyń árbir azamattyń ál-aýqatyn jaqsartýǵa baǵyttalǵanyn alǵa tarta kelip, júzege asyrylyp jatqan mańyzdy jobalar men olardyń zań jaǵynan qamtamasyz etý jaıynda keńinen baıandady.
Atap ótkenindeı, bes áleýmettik bastama aıasynda qolǵa alynǵan 7-20-25 baǵdarlamasy elimiz azamattaryna jeńildikpen baspanaǵa qol jetkizýge jol ashady.
Májilis depýtattary kelgen «iKomek» ortalyǵy 2017 jyly apattar men jazataıym oqıǵalarmen kúres boıynsha kommýnaldyq jáne jedel qyzmetterdiń jumysyn úılestirý jáne baqylaý, sondaı-aq azamattardyń ótinishterin qabyldaý maqsatynda qurylǵan.
Ortalyq 4 myńnan asa beınebaqylaý qurylǵylarymen jabdyqtalǵan. Kameralar ásirese adamdar kóp jınalatyn aımaqtar, ıaǵnı oıyn-saýyq ortalyqtary, meshitter, aıaldamalar men vokzaldarda ornatylǵan.
«iKomek» monıtorıng jáne jedel áreket etý ortalyǵynyń» dırektory Janat Dýbırovanyń aıtýynsha, ortalyq aıasynda halyqqa ákimdiktiń 17 basqarmalary, 91 kommýnaldyq jáne tótenshe jaǵdaılar men 637 mekeme qyzmet kórsetedi. Bul qyzmet túrleri 109 nómiri boıynsha júzege asyrylady.